Sngewkhia ka NEC ba tlot ka rukom pyntreikam ki Jylla NE ia ka song jingiarap pisa: Secretary

Syllad | The Rising MeghalayaFebruary 9, 2024

U Secretary ka North Eastern Council (NEC), u K Moses Chalai haka 8 tarik Rymphang, u la ong ba ka jingpyntreikam ia ki song jingiarap pisa jong ka Sorkar Pdeng na ka bynta ki jylla ka thain shatei lammihngi (North East) kam pat shym la poi sha ka thong kumba la angnud.

Watla katta haba kren sha ki lad pathai khubor, u Chalai u la ong kumba ka long mynta ngi la sakhi ba ki jylla jong ka thain ki la kham kiew shakhmat. “Lymda ki lah ban pyniaid sted ia ki kam ki jam ngin ym lah satia ban iaid sted, kumta ka don ka jingpyniasoh ha kino kino ki bynta, hynrei Nga lah ban ong ba ka la don ka jingpyrshang borbah bad ka lah ruh katto katne ka jingkylla,” u la ong.

U la ong ruh ba “Ha ki sngi ki ban dang wan kane kan nang kham biang shuh shuh.Kum ka nuksa ka Tnat DoNER ka ju mang pisa tang kumba palat ne Duna ia ka T.3,000 klur, hynrei mynta u snem lyngba ka Prime Minister’s Development Initiative for North East Region (PM-DevINE) Scheme, kane ka mangtyngka ka la kynjoh sha ka T.6000 klur. Kaei kaba Nga mut ban ong ka long ba ka Sorkar India ka la sngewthuh ba ngin lah ban leh kham bha, bad kumta ruh ka long kaba donkam ia baroh lang kynthup ia ka NEC ba kin nangtrei kham bha shuh shuh.”

Halor ki jingtreikam jong ki jylla ka thain North East, u Secretary ka NEC u la ong; “Ngam kwah ban jer kyrteng hynrei baroh ki jylla jong ka thain kim long kumjuh, hynrei ka la don pat ka jingkylla, bad ki jingiarap pisa bathymmai kim shym la long lyngba ki treasury ne ki finance department jong ki jylla, hynrei ki leit beit beit sha ki tnat kiba pyntreikam. Mynta kan shong ha ki tnat kiba dei khmih bad ki kynhun kiba pyntrei ia ki projek kumno ba kin lah ban pynsted ia ki jingtreikam.

Ha kaba iadei bad ka Meghalaya, u Chalai u la ong, “Haba kren kyllum, ha Meghalaya baroh ki tnat treikam ruh kim long kumjuh, katto katne ki tnat treikam ki dei kiba shimkhia, ki don kiwei pat kiba suki ha ki rukom treikam. Kumta wat hapoh ki jylla ruh baroh ki tnat treikam kim long mar kumjuh. Nga sngewthuh ba ki rukom treikam hapoh ka sorkar ki la kham biang bad kumta ki donkam ban leh kham bha shuh shuh ha ki sngi ki por ki ban dang wan.”