Sngewkhia ka RBYF ba sumar hajuh ia ki longkmie bad khunlung ha ka jaka thiah ki shynrang ha Umden PHWC

Syllad | The Rising MeghalayaSeptember 16, 2024

Ki nongialam ka seng Ri Bhoi Youth Federation (RBYF), Umden Circle ha ka jingleit jurip ia ka Umden Primary Health and Wellness Centre, Ri Bhoi District ha ka 14 tarik Nailur, ki la dap da ka jingsngew kyndit bad sngewkhia jur halor ka jingpyndonkam ia ka kamra thiah ki shynrang (Male Ward) na ka bynta ki nongpang kiba ki dei ki longkmie bad ki khunlung khynnah.

Ka jinglap jong ka seng ia kane ka jingthurmur jong ki bor ba dei khmih kane ka PHWC ka la wan long ruh hadien ba ki nongialam ka RBYF Umden Circle ki la pynlong ia ka jingleit jurip kaba kyndit ia katei ka jaka sumar hadien ka jingioh pdiang ïa ka jingud jingnam na ki paidbah kiba leit ban wad ia ki lad jingsumar ha katei ka PHC.

Haba kren sha ki lad pathai khubor, u samla Founder Syiem, President ka RBYF Umden Circle u la ong ba ka seng ka sngewkhia jur  halor katei ka jingpynthiah lang ïa ki nongpang ha kajuh ka kamra ha kaba ka seng ka la kyrpad ruh ia ki bor ba dei peit ba kin ym pyniakhleh lang ia ki nongpang ha kajuh ka kamra.

Nalor kata ha kane ka jingleit jurip ka seng ka la ioh ruh ban pynsngew ha ki Dr. Incharge ïa ki jingduna ha katei ka jaka ai jingsumar, kata naduh ka jingbym don ïa ka jaka leit shabar paidbah ne “Public Toilet” kaba la wanrah shibun ka jingeh ia ki paidbah bad kumjuh ka jingbym treikam bha ka kali kit nongpang 108 ha ki por ba ki paidbah ki donkam ban kit ban bah ïa ki Nongpang.

Shuh shuh ka seng RBYF ka la ïoh ruh ban buh da ka jingthoh ha kaba ka la pynpaw ïa shibun tylli ki jingeh kiba kum ki paidbah ki hap ban mad haba ki wan ban shah sumar ha katei ka PHWC bad ki la dawa ruh na ki bor ba dei peit ba ki dei ban shim khia mardor ïa kine ki jingeh na ka bynta ka jingbit jingbiang jong ki paidbah kiba donkam ia ki lad jingsumar.