Sngewkhia ka SBYWA bad ka KSU ban die lilam ka JHADC ia ki wah ha khappud India Bangladesh

Syllad | The Rising MeghalayaAugust 3, 2020

Ki artylli ki seng jong ka East Jaintia Hills kiba kynthup ia ka Southern Border Youth Welfare Association (SBYWA) bad ka Khasi Student Union (KSU), Hingaria Unit bad ka shnong Hingaria kila ai da ka dorkhat sha ka JHADC ban pyrshah halor ka jingdie lilam iaka wah Prang bad ka Wah Tisang (Wah Myntdu) ki bynta ba sharum ka Myntdu shuwa ban tuid sha Bangaldesh.

Ha ka shithi kaba la ai ha ka Special Officer jong ka JHADC ka KSU bad ka SBYWA lem bad ka shnong Hingaria ki ieng pyrshah lada ka JHADC kan die lilam ia ka wah Prang, wah Tisang bad ki wah heh wah rit kiba don ha thain khppud bad ka ri Bangladesh sha kino kino ki riew shimet lane sha kino kino ki kynhun ne ki company. 

Kane ka jingpyrshah jong ki sengbhalang lem bad ka shnong Hingaria ka long kum shibynta ban pynneh pynsah ia ki dohum dohwah bad ki jingthaw ba im ha um. 

Katkum ka shithi kaba la soi kyrteng da u President ka SBYWA U samla Skhembor Shadap bad u President jong ka KSU Hingaria Unit,u Bah Samson Lamin lem u Samla Garness Talang, Secretary Shnong Hingaria kila pynpaw ruh ba ka jyllei ba ka kam pyniap dusmon iaki dohum dohpnat da kaba wieh dawai, ka jingther bom ia ki wah kaba pynduh jait iaki dohum dohpnat.

Ka SBYWA, KSU bad ka shnong Hingaria kila kyrpad ia ka Council ba kan leh ia kaba donkam na ka bynta ban iada lane ban pynneh pynsah ia ki dohum dohwah katkum ka aiñ jong ka Council lyngba ka UKJHD Fisheries Act 1954, la u samla Shadap

La kyrpad ia ka JHADC ban phah peit lane ban thung da ki nongap ia kitei ki wah, ban daiñ kuna kaba heh lada don mano mano ba pykheiñ ia ka aiñ, ryngkat ka jingai buskit ia kino kino kiba briew kiba lap ia kiba pyniap pathar ia ki dohum dohwah ha wah Prang, Wah Tisang (Kwator-Borkhat) bad la kyntu ruh ia ka JHADC ba kan ai da ka jingthoh sha baroh ki Dorbar Shnong kiba don ha thaiñ khappud khnang ba ki paidbah kin dup tip ia ki aiñ jong ka Council kaba katkum ka UKJHD Fisheries Act 1954.

Ha katei ka sngi la ai copy ruh sha u Dr. Sankey Shangpung , MDC ka thaiñ Bataw Lakadong Constituency, ban shimkhia lem ia kane ka kam bad ha ka juh ka por la kyntu lem ia ki Dorbar shnong jong ka thaiñ ban pyrkhing ia ki briew ban leh ia ki kam beaiñ.