Sngewlem ka Synjuk Ki Rangbah Kur halor ka jingkhlad u Bah HS Shylla

Syllad | The Rising MeghalayaAugust 7, 2020

Ki dkhot jong ka Synjuk Ki Rangbah Kur: Ka Bri U Hynñiewtrep ka pynpaw ka jingkyndit ka ba khraw ban tip ba u khliehduh nongseng ka synjuk, u Bah Hispreachering Son Shylla u lah khlad noh mynta ka sngi 7tarik Nailur, 2020.

Ha ka kyrdan kum u Shongknor Rangbah jong ka Khasi Hills Autonomous District Council u la trei borbah ban thawaiñ na ka bynta ban ïada ïa ka jaitbynriew Khasi bad shwa ba un shongthait na ka kam saiñ pyrthei u la seng ïa ka Synjuk Ki Rangbah Kur: Ka Bri U Hynñiewtrep ha ryngkat bad katto katne ki rangbah kur na kylleng ka Ri Khasi.

Shuh shuh, lyngba ka synjuk la pynphriang ka jinglong dkhot na kylleng ki thaiñ ban ïakit ïabah lang bad ki khun ki hajar ïa ka khia ka shon jong ka jaitbynriew. Nalor ki aiñ katkum ki riti tynrai ki ba lah dep thawaiñ ha dorbar Khasi Hills Autonomous District Council, la thaw ruh ïa ka Clan Bill ka ba dang sahteng ban mynjur pynkupbor da u Lat ka  jylla.

Ka Synjuk ka ai ka khubor sngewlem sha ka longïing longsem jong u Bah H S Shylla bad duwai na ka bynta ka mynsiem ban jahthait ha ka jingsuk. U Rangbah Hispreachering Son Shylla u dei u khlur ban sah kynmaw ha ka khana pateng jong ka jylla na ka bynta ki kam ba radbah ban pynneh ïa ka snap tynrai Khasi. Ki ba kham kongsan na ka iktiar u rangbah khliehduh HS Shylla ha ka Khasi Hills Autonomous District Council, ki dei ba la pynkupbor ïa ka Seng Khasi kum ka shlem ba lah ithuh da ka aiñ ha jylla na ka bynta ban pynïaid ïa ka kam shongkha shongman bad ka Tangjait katkum ki riti dustur tynrai ki Khasi.