Sngewlem u PM Modi halor ka jingiap ki spah ngut ki briew na u jumai ba jur ha Nepal

Syllad | The Rising MeghalayaNovember 4, 2023

U Myntri Rangbahduh ka ri u Narendra Modi u la pynpaw ka jingsngewlem ha kaba iadei bad ka jingduh jong ki spah ngut ki mynsiem briew na ka jingkhynniuh u jumai bajur ha Nepal hynnin ka miet sngi Thohdieng.

Na ka liang u PM Modi, u la pynpaw ba ka India ka don ryngkat lang bad ki nongshong shnong ka Nepal bad ka long kaba kloi na ka bynta ban phah ia ki lad jingiarap. Nalor kata u kyrmen ruh ia ka jingioh khiah noh hapdeng jong kito kiba la ngat ha ki jingmynsaw.

Haba pynpaw lyngba ka rynsan social media X, u PM ka India u la ong; “Ka long kaba sngewsih shibun halor ka jingduh jong ki mynsiem briew bad ki jingjulor namar u jumai ba jur uba la pynkhynniuh ia ka Nepal. Ka India ka don ryngkat lang bad ki nongshong shnong ka Nepal bad ka long kaba la khreh ban phah ia baroh ki lad jingiarap. Ngi sngewlem na ka bynta kiba haiing hasem jong kito ki lanot, bad ngi kyrmen ia ka jingioh khiah noh hapdeng kiba la ngat ha ki jingmynsaw.”

U jumai uba don ia ka bor jingkhlain kaba 6.4 in magnitude bad uba don ia ka tyllong ha ka jingjylliew kaba 10 kilomitar u la pynkhynniuh tyngeh ia ka Nepal ha ka miet sngi Thohdieng ba la lah. Ka tyllong jong une u jumai ka don ha ka jingjngai kaba 208 kilomitar na Pithoragarh, Uttarakhand, kane ka long katkum ka National Center for Seismology.

Katkum ki khubor la ong ba kane ka jingkhynniuh jumai ka la shim ia ka jingim jong kumba 140 ngut ki briew bad pynmynsaw ia palat 155 ngut kiwei pat.            

Na ka liang ka National Center for Seismology ka long ruh ba kane ka jingkhynniuh jumai ka la wan jia biang hynne ka sngi Saitjain.