Sngewnguh ka KSU ba pynkhreh ban shna noh ia ka surok ba sahteng na Lama sha Wah Prang Hingaria

Syllad | The Rising MeghalayaDecember 6, 2024

Ka Khasi Student’s Union Hingaria Unit, East Jaintia Hills District ka pynpaw ka jingsngewnguh ia ka sorkar Jylla halor ka jingshimkhia ban pyllait ia ka Preliminary Work Order na ka bynta ban shna ia ka surok ba dang sah teng na ka shnong Lama shaduh Wah Prang Hingaria bad ban maramot ia ka jingkieng ha ka wah Pusi ka jingkieng ba pyniasoh ia ki shnong ka West Jaintia Hills bad East Jaintia Hills.

Ka KSU ka pynkynmaw ba hapoh ka jingialam u samla Garnes Talang General Secratary ryngkat bad ki nongialam shnong jong kitei ki thain kiba kynthup ia u Samson Lamin Rangbah Shnong Hingaria, Kyrmen Swer Rangbah Shnong Borghat, Lap Suchen Rangbah Shnong Natbor bad u bah Daiapherbha Lamare ha ka 17 tarik u Jymmang ki leit ban ai dorkhas sha u Chief Engineer PWD (Rds) Central Division, Shillong, ban kyntu ban maramot noh ia ka surok ba la jot rathai naduh na Lama shaduh Wah Prang Hingaria namar ka la buh jingeh shibun ia ki paidbah nongleit nongwan jong ka thain khapud hi baroh ka wei.

Ha ka jingbuddien jong ka seng klem sangeh na ka liang ka sorkar ka la pynurlong bad mang T.16 klur ban maramot bad ban shna ia ka surok naduh ka shnong Lama shaduh Wah Prang Hingaria nalor ka ba lah sanction lypa bad ka jingtrei ka dang iaid shait shait naduh Wah Prang shaduh Sonapur ka ba kot T.126 klur.

Kumta halor kane bynta ka seng ka ai khublei kyrpang ia u Chief Engineer bad kumjuh ia ka MLA ka thain ki ba la shim khia ia kane ka jingud jingnam jong ka seng ha ryngkat bad ki nongialam shnong jong ka thain, ba lyngba kane ka surok kan pynsuk shibun ia ki Shnong khappud kiba khynthup naduh ka shnong Lama, Borghat, Natbor, Demlakang, Pdeinwah Khynriam, Kwator, Hingaria, Huroi, Lahalein,Lailong, Lejri ter ter shaduh Sonapur.

La ong ruh ba ka jingsniew palat jong kane ka surok ha kine ki snem ba lah dep ka la wanrah jingeh shibun ia ki nongshong shong jong kitei ki shnong khamtam ha ka pang ka shitom ban pynkit sha ki jaka sumar nalor ba jngai ki jaka sumar kin hap ruh ban mad ia ka jingeh na ka jing bym don ka surok ba bha. Ka ba kham sngewsih ka long ba ka lah don teng ka jingduh ei ia ki mynsiem briew tang ha shiteng lynti ban poi sha ki jaka sumar.

Kumta na ka liang ka Seng ka sngewkmen bad ha ka juh ka por ka buh ruh ka jingkyrpad ia ka sorkar bad khamtam ia ka Nongmihkhmat ka thain ka ba dei ruh ka MLA kynthei ba nyngkong na Rilum Jaintia ka ba kloi ban bah ia ka khia ka shon ka Constituency bad khamtam ia ka thain Border namar wat tang ha i por ba lyngkot ba ka la shimti kum ka nongmihkhmat jong ka thain hynrei ka la lah ban wanrah shibun ki kam pynroi ka ba ka thain Border hi baroh kawei ki mad jingeh baroh shi katta.

Ha kajuh ka por ka seng ha u kyrwoh lyngba u samla Aadrias HLTalang Publicity Secretary ka buh ruh ka jingkyrpad ia ka sorkar bad khamtam ia ka MLA ka thain ban kyntu bad bthah ia u/ka contractor ba dei ban pyntrei ia kane ka surok ba kin pyndep noh kham kloi na ka bynta ka jingmyntoi jong ki paidbah ka thain hi baroh kawei.