Sngewnguh ka shnong Muktapur ïa u SK Sunn ba kren halor ka ishu khappud ka India Bangladesh

Syllad | The Rising MeghalayaMay 24, 2020

Ka Dorbar Shnong Muktapur ka dap da ka jingsngewnguh bad sngew burom shikatdei eh ia u Bah S.K.Sunn, MLA Mawphlang constituency uba la wanrah iaka mar iakren ha kaba iadei bad ka International Border Issue India-Bangladesh khamtam iaka Muktapur APL.

Ka Bir Kympleng (Dibir Hoar area) ha Muktapur ka dei kawei na ki Adverse Possession Land (APL) ka India hapoh u pud u sam ka Bangladesh. Katei ka APL ha Muktapur dei kaba la don lypa naduh ba phiah iaka Hindustan (India) – Pakistan ha u snem 1947. Haduh mynta mynne katei ka jaka dang pyndonkam da ki nong India Muktapur ban tong dohkha.

Hynrei naduh u bnai March 2020 ki BSF Kim shah shuh iaki nong Muktapur ban tong dohkha na katei ka Bir Kympleng. Ki la iathuh ba katei ka APL ha Muktapur la aiti Noh daka Sorkar India Sha ka Bangladesh.

Ngi te ngim lah ban ngeit ia kata, kumno la leh iaka khlem ka jingtip ngi kum ki trai jaka ba la biang ki pata ki kot ki sla iaka jinglong trai jongngi ia katei ka jaka ha APL Muktapur.

Lada long shisha kumta  ki jingthoh ha ki Land Boundary Agreement (LBA) kin don beit, hynrei ym don kum Kita. Kumno yn ngeit iaki BSF haba ym don jingthoh (records). Ki BSF lei ki dei tang ki nong iada iaki border, bad u pud u sam, kim dei ki nongpynbeit pud pynbeit sam bad ka dei ka kamram ka Sorkar.

Ngi kynmaw bha ruh iaka jingiasiat kuli (cross firing 2010) hapdeng ka India bad Bangladesh ha u 2010 ka jingiasiat kaba la neh shibnai tam (naduh 4th Feb 2010 haduh 14th Mar 2010 ), ha kaba ki shipai India, BSF, ki la pynlut kumba 3000 (lai hajar) tam ki kuli ban iada ia katei ka APL ha Muktapur. Hynrei mynta pat ki la iathuh ba la aiti (gifted) iaka sha Bangladesh ka bymsngewlah mutdur.

U local MLA jongngi u Lahkmen Rymbui ruh u don ryngkat ryngkat bad ngi ha katei ka por iasiat ha u 2010, u tip bha shaphang ka APL Muktapur.

Wat u Chief Minister jong ngi u Conrad K Sangma, ruh u la wan ban sakhi dalade hi ia katei jingiasiat thma hapdeng India-Bangladesh ha u 2010. Ha katei ka por u don haka liang opposition. U ruh u tip bha shaphang ka APL Muktapur.

Ki dkhar Bangladesh naduh ba sdang u snem 2020 ki la sdang ban Kam trai ia katei ka APL ha Muktapur. Ki la sdang ban rep kba bad tong dohkha ha syndah Shnong Muktapur.

Hynrei katkum ka LBA Protocol 2011 (rectified 2015), la ailad tang iaki nong Muktapur ban tong um, tong dohkha bad leit mane blei sha Kali Mandir ha Bir Kympleng (Dibir Hoar area). Ym shym la shah iaki Bangladesh katkum ka LBA Protocol 2011. Hynrei hangne ha kumba jia long ha kane ka jaka spot/field pat da khongpong, tang ki nong Bangladesh la shah ban leit sha kane ka jaka.

U local MLA jongngi u Lahkmen Rymbui, um ju kren ei ei shaphang katei ka APL ha Muktapur, wat bad u Chief Minister jongngi ruh u tip bha shaphang jongka, hynrei un leh kumno haba u nongmihkhmat ka thain um kren ei ei.

Hynrei ka jingkren u Bah S.K. Sunn, MLA Mawphlang constituency ha Assembly ban wanrah ha khmat u Chief  Minister, Conrad K. Sangma iaka international border issue ha Muktapur ka la ai mynsiem iangi ki briew  ba shong khappud Bangladesh, khamtam eh iangi ki nong Muktapur.

Ka pyrthei bad ka Sorkar ki la klet iangi. Dei tang u Bah S.K.Sunn, iba dang kynmaw iangi, iba dang khein briew iangi, iba iohi iaka jingeh jingjynjar bangi iakynduh ha ki thain border. I dei shisha I riew ieid ri, I riew ieid jaid bynriew para Khasi-Khara.

U dei u riew  rangbah, bad u nongmih khmat u ba trei hok ia u paidbah, uba ieng skhem hala ka nongrim ban iada iaka khyndew ka shyiap u para Khasi-Khara, ym Kum kiwei nongmihkhmat kiba shu kohnguh khlieh katba rai ka Sorkar khlem khein snep ia ka iap ka im ngi u rit u ria tangba lah biang ialade.

Wat u local MLA, jongngi u Lahkmen Rymbui uba long ruh u Border Minister, um ju wanrah issue ei ei ha kaba iadei bad ka jingeh ha khappud. U hun beit katba Rai ka Sorkar, wat lada ka fencing Kan iaid napdeng Shnong ruh.

Haka jingshisha dei u local MLA, kein ban iohi iaka jingeh jongngi. Kumno la iohi da u Bah S.K.Sunn, u MLA ka Mawphlang iaki jingeh jongngi.

Sa shisien ngi ai khublei kitbok kit rwiang ia phi bah S.K.Sunn, MLA Mawphlang, iaki Kam ba bha jong phi, kum u nongmihkhmat ieid ri bad jaid bynriew. To u Blei un nang kyrkhu iaphi, iaki Kam ba bha jongphi ba phin nangroi nangpar haki por ki ban wan, ha ka Kam babha jongphi, ba phin nanglah shuh shuh ban shakri hok ia ki briew ka constituency jongphi, iaka ri Khasi jongngi bad iaka jylla hi baroh kawei.

Na ka Dorbar Shnong Muktapur