Sngewnguh ka shnong Wapungskur iaka Mawsynram halor jingiarap ia kiba hap kali

Syllad | The Rising MeghalayaAugust 17, 2022

Ka Dorbar Shnong Wapungskur, East Jaintia Hills kala pynpaw ka jingsngewnguh iaka Dorbar Shnong Mawsynram hapoh ka jingialam u Rangbah Shnong bad Secretary, u Bah AL Shangpliang bad u Bah P Dohling, bad ia baroh ki nongshong shnong jong ka shnong Mawsynram kila la kloi ban pynioh jingiarap ia ki ar ngut ki kiba hap kali shariat ha Mawsynsraw kaba la jia haka 13 tarik une u bnai.

Ka Dorbar Shnong Wapungskur Waheh Shnong, u Ma Deolangki Dkhar, ula ong b akum ka shnong kim lah khlem da ai khublei ia shnong Mawsynram bad u paidbah halor ka jinglong la kloi jong ki ban pynioh jingiarap, kaba la ioh ban pyllait im ia u wei na ki lanot aksident.

Ka dorbar shnong Wapung ka sngewnguh ruh ia u  Acting Syiem, ka Hima Mawsynram, Pa’iem B. Marbaniang; ia ki pulit ka Mynsynram Police Station; ia u MDC ka Mawsynram Constituency, Bah Albin Sawkmie;  Executive Magistrate, ka Mawsynram Civil Sub-division, u Bah P Mukhim, J.E, PWD (Road) Mawsynram, Division, Bah AJ Blah; ia ki sengbhalang, naduh ka KSU, HYC bad kiwei kiwei; lem bad ia ki nongialam niam ba pher ba pher ka shnong Mawsynram, kyrpang eh ia i bah Hesland Syiemiong, i wei na ki nongshnong shnong jong ka shnong (Mawsynram ) bad ruh ia kiwei kiwei kiba ym shym la lah ban kdew kyrteng lut hangne, halor ka jingiarap ba radbah jong ki baroh ha kiba bun ki bynta ba khraw, bym lah ban ñiew lut hangne, naduh ka 13 tari haduh ka 15 tarik mynta u bnai, halor ka ka jingkynduh jong ngi (ka shnong Wapungskur), ia ka jingjia  ba sngewsih kthang ia ki arngut na ki nongshnong shnong jong ka shnong Wapungskur na ka jingur ba shyrkhei jong ka kali ha kaba ma ki don, ha u surok hajan ka Mawjymbuiñ Cave,  ha ka 13 tarik, u August, 2022 ha kaba ngi la duh noh ia  ka jingim ba kordor jong u wei na kitei ki ar ngut, katta ia Nidayoophi Dkhar, katba donbok da ka jingwan kloi  pat jong kitei ki nongiarap ba la kdew haneng, la lah ban pyllait im pat ia u wei, u ba mynta u dang don ha ka jingshah sumar ha kawei na ki hospital ha Shillong.

Ia ki kam ba khraw jong kitei kiba la kdew haneng baroh, ka Dorbar Shnong kan ym lah shuh ban siew kylliang da lei lei ruh em, hynrei kan buh tang ha ki jingduwai ia ki baroh ba kin ia koit ia khiah krat bad ia roi kyrhai ha baroh ki liang, ong u Waheh Shnong Wapungskur.

Ka Dorbar Shnong Wapungskur, ka pynpaw ruh ia ka jingsngewnguh ia ki kynhun, S&RT bad SDRF jong ka sorkar jylla, ia ka Kyrmen Foundation bad ruh khamtam eh ia u Ma Kyrmen shylla, Minister ka Sorkar Meghalaya i/c Revenue and Disaster Management Department bad kiwei kiwei.

Ka Dorbar Shnong Wapungskur, ka pynpaw ia ka jingsngewnguh ruh ia baroh ki khun jong ka Dorbar Shnong Wapungskur, ia ka Balang Presbyterian Wapung, lem bad ia kiwei kiwei de ki paralok na ka Shnong Wapungshnong bad ia baroh kito kiba la shim ia ka bynta kaba khraw ha ka ban iarap ia ka Dorbar Shnong Wapungskur ha katei ka jingjia  ba sngewsih ba la kdew haneng.

Khatduh eh, ka Dorbar Shnong Wapungskur, ka pynpaw ruh ia ka jingsngewnguh ia baroh ki riewpawkhmat bad ki paidbah kiba na jan bad na jngai, kiba la wan ia don ryngkat lem bad pyntngen ia ka Dorbar Shnong Wapungskur bad khamtam eh ia ka iing ka sem jong i Nidayoophi Dkhar, Bam Kwai ha Dwar U Blei, naduh ka 13 tarik haduh ka 16 tarik, ka sngi pyndep khatduh ia ka basah jong i (Late Nidayoophi Dkhar).