Sngewnguh ka Sohphoh iaka kynhun ki nongkiew lum halor ka jingsam marbam

Syllad | The Rising MeghalayaAugust 11, 2020

Ka shnong Sohphoh kala pynpaw ka jingsngewnguh sha ka kynhun ki nong kiewlum, ka West Jaintia Hills District Adventure Sport Mountaineering Club kaba la wan ban ai jingiarap ia ki ba duk ba rangli ha shnong Sohphoh ha ka 7 tarik u August 2020.

Kane ka seng ka la wan ban ai jingiarap da u khaw ia ki long iing ki ba duk ba kyrduh ki ba ia kynduh jingeh bha ha kum kane ka por. Kine ki long iing ki ba kynduh jingeh, ki kynthup ia ki ba don jingduna ha ki dkhotmet, ki ba pang ba shitom, ki khunswet khunrangi bad kiwei.

U Sambor Surong president West Jaintia Hills District Adventure Sport Mountaineering Club bad ki dkhot jongka ki ba kynthup ia I samla Illuminate Surong bad u samla Wellborn Dkhar kila iadonlang haba sam iaki marbam.

U Symbud Waheh Shnong, bah Kishon Kharsahnoh ula pyniaid iaka jingialang kaba lyngkot bad la ioh ia ka jingkren na u Sambor uba la kyntu ia ki nong shnong shnong ba ki dei ban long ki briew kiba leh khuid, ki ba phikir, ki ba kohnguh ia ki kyndon ba la btah ka sorkar bad khamtam ban long ki ba kloi ban iarap ia ki para marjan ha ba ki ia kynduh jingeh.

U waheh shnong ka shnong Sohphoh, Ma Mutshwa Thabah ula ai khublei iaka West Jaintia Hills District Adventure Sport Mountaineering Club kaba la kner la ka kti jingiarap ban sam da ki marbam sha ki nongshong shnong bad kitbok kitrwiang iaki nongialam bad ki dkhot ka kynhun ki nongkiew lum bad kin ioh ka met kaba koit ka khiah bad ba kin nang lah shuh ban trei na ka bynta ka bha ka miat ka imlang ka sahlang.