Sngewsih ka TUR halor ka jingduh noh ia u Tarun Bhartiya, u nongialeh iaka jingshah ban bein

Syllad | The Rising MeghalayaJanuary 26, 2025

Ka Thma U Rangli-Juki (TUR) ka pynpaw ia ka jingsngewsih kaba khraw halor ka jingkhlad kyndit jong u Tarun Bhartiya uba long u dkhot jong ka kynhun TUR ha ka 25 Kyllalyngkot (January) 2025.

U Tarun u la aiti met bad mynsiem bad shi rta jingim ha ki kam ïakhih bad ïakhun na ka bynta ki hok jong ki rangli ki juki, ki nongtrei nongbylla bad kito kiba shah ban beiǹ. U im da ka jingngeit ba ka pyrthei kaba kham bha, kaba shngaiñ bad kaba baroh ki ïalong mar ryngkat ka dang lah ban jia long. U im ka jingim kaba la pynkhreh ban ïeng pyrshah ia ki kam thombor da ki riewdon bor kiba meng bad hangamei. Kane ka jingpynkhreh jong u kam dei eh tang kaba ïakhun ha madan, hynrei lyngba ki phlim ba u shna, ki dur ki dar kiba u shon bad ki jingrwai poitri ba u thoh.

Ka jingieid bad jingñiewkor jong u Tarun ia ka Jylla Meghalaya bad ki nongshong shnong jong ka ka paw shai ha ka jingshlur jong u ban kylli jingkylli, ban thew ban woh, ban thir, ban thaiǹ nia bad ban kren kam pher wat u tip ba lada leh kumta ka jingma ka don ia ka jingim. U long uba skhem jingmut haba u pynpaw pyrshah ia ka jingkuman ne jingbamsap ha ki tnat treikam sorkar bad ki jingmutlop jong ka rukom treikam ka sorkar. Um ju riej ban kren pyrshah ia ka bamsap, ka jingpynȉapher para briew ha ka Nongbah bad ka Jylla, ia ki nongsaiǹ hima kiba pynpait pynpra ia ka jingȉadei ha ka imlang sahlang bad ruh ia ka jingleh donbor bad jingthombor jong ki shynrang ia ki kynthei kaba jyllei ha kane ka Jylla wat la ka dei ka imlang sahlang ne ka Jylla kaba shim jait na ka kmie. 

Barabor U Tarun u don bad pynpaw ia ka jingsngewthuh ba ka synshar khadar ka dei ban kdup bad kynthup lang ia baroh, ban burom bad ǹiewkor kylliang, ban sngap bad shah skhor ia ki khana bad jingshem jong kiwei. U long pyrshah bha ia ka saiǹ hima kaba don tang kawei ka rong bad kaba shu kyllum tang ha kawei ka thup ne kynhun.

Ki dkhot jong ka TUR ki pynpaw ia ka burom ba ki la ïohlad ban ïashut jabieng, ban ïatai, ban ïamutdur ia ka pyrthei, ban ïatrei lang bad tei ȉa ka imlang sahlang ryngkat bad u Tarun. U ju phylliew ia ki jingmut kiba dap da ka jingkyrmen bad u ȉai ban ba ym dei ban duh jingkyrmen wat hapdeng ki jingeh kiba bun. Ban duh ia u paralok uba kum u Tarun ka long ka jingduh kaba khraw, hynrei kumba u Tarun un khmih lynti ba yn bteng ia ki kam kiba ngi la ȉasdang naduh ka snem 2013. 

Ka TUR ka khot ka wer ia baroh ban ïashim bynta lang ha ka jingȉalang ai burom ia ka jingim jong u Tarun ka ban long ha ka 27 January 2025 ha ïing sah jong u ha Lum pangad, Shillong ha ka por 12 baje shiteng sngi.