Sngewskhem ka HBDRF ba ka jingiakren pynbeit pud kan pynthikna ban pynphai biang ki shnong Khasi Pnar

Syllad | The Rising MeghalayaApril 14, 2025

U Chairman ka Hynñiewtrep Border Dispute Redressal Forum (HBDRF) u Bah Chandame Sungoh u la ong ba ka 13 tarik Iaiong ka dei ka sngi ka ban sah kynmaw kum ka sngi kaba sngewsih na ka bynta ki paid nongshong shnong Khasi Pnar jong ka Block I Block II.

Lyngba u kyrwoh u Bah Chandame u la ong ba dei ha kum kane ka sngi ha u snem 1951 ba ka Sorkar Assam ha katei ka por ka la pyngnat jubor ia ka Labang Nangphyllut Dollloiship kaba la tip kum ka Block -I bad shibynta jong ka Raid Nangtung Khyrwang ba la tip kum ka Block II da kaba pynhap ha ka United Cachar & Mikir Hills ba la tip mynta ka Karbi Anglong Autonomous Council ka Assam ha ka por ba pynkha ia ki District Council da ka jingpynbna paidbah ne Notification TAD/R/31/50/149.

“Ia kane ka jingpynbna la shu leh donbor da ka Sorkar Assam khlem ka jingtip bad ka jingmynjur jong ki paid Khasi Pnar kiba dei ki trai muluk bad ki nongshem ia kane ka jaka. Bad kane ka jingleh donbor ka la pynduh noh ia baroh ki hok bad ka jingbishar hok ia ki nongshong shnong jong kane ka thain,” u la ong.

Nalor kata u la ong ruh ba ka Forum bad ki nongshong shnong ka thain kin bteng ban pynpaw pyrshah ia kane ka jingleh donbor bad bym hok jong ka Sorkar Assam bad kin dang iai bteng ban iasaid na ka bynta ban pynphai pat ia kane ka jaka sha ka thain jong ki kpa tymmen jong ka jylla Meghalaya.

Ka Forum ka pynpaw ka jingsngew skhem ba lyngba ka kam iapynbeit pud kaba dang iaid mynta shakhmat hapdeng ka Meghalaya bad ka Assam ia kane ka jingdawa kaba la sahteng la slem bha ban pynphai noh ia ka Block I Block II sha ka Meghalaya yn lah ban pynurlong.