Sngewskhem u ma Sniawbhalang Dhar ban jop ka NPP, 5 constituency tang na Rilum Jaintia

Syllad | The Rising MeghalayaNovember 12, 2022

U Ma Sniawbhalang Dhar u Myntri pynroi sor ka sorkar Jylla uba long u MLA ka Nartiang ula pynpaw ka jingsngewskhem bad ula ai jingkhein ba ka National People’s Party (NPP) kan jop bun tylli ki constituency haka elekshon MLA 2023.

Ia kane ula ong haba kren bad ki nongthoh khubor hadien ka jingialang pynskhem nongkitkam jong ka NPP Nartiang Block Committee haka sngi Thohdieng ha Iawpynsin, Wahiajer, West Jaintia Hills District.

Ula ïathuh ba ka na 36 tylli ki Constituency ha ri lum Khasi Jaintia ka NPP kan jop kumba 20 ngut bad 16 ngut na ka 24 seat ha ri lum Garo Hills. Tang na Rilum Jaintia u ma Sniawbhalang Dhar ula kam ba ka NPP kan jop haki san tylli ki constituency.

U Ma Sniaw ula ong ba u thikna ba un sa jop biang ïaka elekshon kaban sa long ha u snem 2023.

Ha Rilum Jaintia, u Ma Sñiawbhalang Dhar u ïakhun pyrshah ïa u kyrtong ka Congress u Ma Emlang Laloo bad ar ngut kiwei ha Nartiang Constituency.

Katba ha Jowai Constituency u Ma Wailadmiki Shylla un hap ban pynkhreh tyngeh ban wan phai biang kum u MLA namar ka jingïakhun kalong hapdeng u kyrtong UDP u ma Moonlight Pariat bad u Ma Andrew Shullai na ka TMC.

Ha Raliang Constituency ka jingïakhun ka long kaba itynnad hapdeng u Ma Comingone Ymbon bad u Ma J T Suchiang uba long MDC kiba na kajuh ka shnong bad ar ngut kiwei pat ki kyrtong.

U kyrtong ka NPP na Mowkaiaw, u Ma Habahun Dkhar un hap ban treishitom ïa u MLA ka UDP u Ma Nujorki Sungoh bad u kyrtong ka Congress.

Katba ha Khliehriat Constituency ka jingïakhun ka long hapdeng u ma Nehlang Lyngdoh u kyrtong ka NPP bad u Kyrmen Shylla uba long u MLA ka UDP.

Ka longkmie Santa Shylla ka kyrtong ka NPP na Sutnga Saipung Constituency kan hap ban pyrkhat kum u rangbah khnang ban pynliem ïaki arngut ki riew rangbah u Ma Shitlang Pale uba dei u MLA bad u Ma Vincent Pala uba dei u MP ka Shillong Constituency.

U Ma Stephan Mukhim u kyrtong ka NPP na Amlarem un aireng pyrshah ia u Myntri kam pohiing u Ma Lakmen Rymbui.

Haba kylli, U Ma Sñiawbhalang Dhar ula ong lada u jop biang ha kane ka kynti un pyndep ïaki kam kiba sahteng bad kawei kaba u angnud eh ban pyndep kadei ka Ïaw Pynsiñ ha kaba u kwah ban wanrah noh daka Multiplex ha kane ka ïew.