Sniew tasam ka surok ba pyniasoh iaka Bataw Borkhat bad kiwei dawa maramot ka SBYWA

Syllad | The Rising MeghalayaJune 14, 2019

JOWAI: Ka Southern Border Youth Welfare Association (SBYWA), kala leit dalade ban jurip ia ka surok ba pynïasoh ïaka shnong Rymbai-Bataw-Borkhat-Jelalpur (RBBJ) bad kala lap ba ka surok kala sniew tasam kaba dap da ka ktieh bad ki thliew ki syar kaba wanrah jingeh haduh katta ban ïaid ban ieng ki kali ki motor ha kane ka aiom slap.
Haka jingleit jurip jong ka SBYWA haka sngi Palei kala lap ba ka sorkar kala sniew shaba palat bad kala kylla long surok khlaw kaba la dap um bad dap ktieh kaba buh jingeh iaki kali ban iaid.

Kane ka surok ka pyniasoh ruh bad ki shnong khappud ka India-Bangladesh bad ka SBYWA kala dawa na ka tnad shna surok ban maramot ïa kane ka surok ban pynsuk ïaki nongshong shnong ban iaid ban ieng bad ban pynoi iaki marrep sha iew sha hat.

Ka SBYWA kala kynnoh ruh ba jingsniew kane ka surok ka dei ruh na ka jingiaid ki trok kit masi kiba suba jur ba ki shalan tuh sha Bangladesh.

U President bad u General Secretary SBYWA u Skhembor Shadap bad u Namphrangmi Talang kila pynpaw ba ka jingsniew jong kane ka surok ka ktah ia ka leit ka wan jong ki nongshong shnong ka thaiñ naduh na Borkhat, Natbor, Pdengwah Khynriam, Kwator, Hingaria bad kiwei kiwei ki shnong.