Sniew tasam ka surok Rymbai Borkhat im syrtok ki paidbah

Syllad | The Rising MeghalayaFebruary 4, 2021

Ka surok kaba pyniasoh ia kiba bun tylli ki shnong bha East bad West Jaintia Hills District, hynrei ka long pat ka surok kaba khohruh khohram kaba la pynlong iaki paidbah nongshong shnong ban im hadpeng ka jingsyrtok namar ba sniew tasam ka surok na Rymbai, Bataw shaduh Borkhat bad kiwei kiwei ki shnong kiba hap ha khappud India Bangladesh.

Kane ka jingsniew jong kane ka surok kala pynlong iaki nongialam ka Meghalaya People United Front (MPUF) East Jaintia Hills District haryngkat bad ka bor shnong Borkhat ban jurip ia kiba bun ki bynta jong ka surok haka 3 tarik une u bnai.

Kane ka surok kadei kaba la tip kum Rymbai-Bataw-Borkhat-Jalalpur Road bad kadei ka surok kaba kongsan bha iaki nongrep ka thain ban pynpoi iaki mar rep mar riang jong ki sha ki iew ha Ladrymbai bad Khliehriat ha East Jaintia Hills kumjuh sha West Jaintia Hills District lyngba ka shnong Kharkhana sha Muktapur, Dawki bad Jowai.

Ha kane ka jingleit jurip ka MPUF la ialam da u Kyrshan Blah, president MPUF East Jaintia Hills District, ha ka jingdonlang u President San Shnong MPUF J Phawa, President MPUF Jalyiah Unit Youwansuk Rymbai bad ki dkhot, u Waheh Shnong bad Secretary ka shnong Borkhat u ma Kyrmen Swer bad u Jewellson Rymbai.

La lap ba kane ka surok ka sniew tasam marsien lait iaka shnong Rymbai khamtam haki bynta ka shnong Bataw Lama bad ter ter haduh Borkhat.

U ma Kyrmen Swer ula iathuh ba halor ka jingjot bad jingtwa kane ka surok naka liang ka shnong ka la ai jingtip sha ka tnad PWD, hynrei kane ka tnad kala leh bymsuidniew bad kam shym la maramot iaka surok kaba buh jingeh bha iaki nongshong shnong ka thain haba pang ba shitom.

U la ong ruh ba ka daw ba kane ka surok ka jot rathai ka dei ka jingbym don ki nala bad haka jingkieng kaba don haka shnong Borkhat ruh kiba bun ki bynta kila twa na ka jingwan ka um saw haka aiom slap.

“Bunsien ngi maramot hi bad shna iaki nala lyngba ka skhim 100 sngi tang ban tuid ka um bad ban lait ka surok ban julor ne twa,” la ong u waheh shnong Borkhat.

Na ka liang u Secretary shnong u ma Jewellson Rymbai ula pynpaw ba kane ka shnong ka la shah ieh bein ha ka sorkar ha kiba bun ki liang, nalor ka surok ki mad jingeh haka bording bad ki Post light hapoh kane ka shnong ki la sarang lut bad bun na ki kiba la jan kdiah ne khyllem kiba buh jingma jingmynsaw ia ki khyllung khynnah. “Ngi la ujor sha ka tnad MeECL, hynrei haduh mynta kim shym la wan ban bujli,” ula ong u secretary shnong.

Ka MPUF kala rai ban leit buh da ka dorkhat sha u Myntri ka PWD, ka tnad PWD bad kumjuh sha u MLA ka thain u ma Shitlang Pale ban kyntu ban shna bad ban maramot noh wut wut ia ki bynta kiba la julor bha khamtam hajan ka jingkieng Borkhat kaba don ha Wah Myntdu ban suk ka iaid ka ieng u paidbah.