Snohkti ka Jowai ban rakhe iaka sngi pyrshah dih drok bad khaïi beain
Kum shibynta ban rakhe iaka International Day Against Drug Abuse and Illicit Trafficking bad ka Nasha Mukt Bharat Abhiyan la pynlong iaka prokram ha Thomas Jones Synod College, Jowai da ka Breakthrough De-Addiction and Rehabilitation Centre, KJP Synod Mihngi haka sngi Nyngkong.
La kyrshan da ka ophis jong ka District Social Welfare Officer Jowai.
Ha kawei pat ka prokram la pynlong ha Chutwakhu Indoor Auditorium, Jowai da ka ophis u Superintendent of Police West Jaintia Hills District.
La pynlong ia kine ki prokram ban pynsngewthuh paidbah halor ka jingma u drok bad ban pynshlur iaki nongshong shnong ban iakhun ban rat dyngkhong.
Ka jingthmu jong kane ka jingïalang ka long ban pynsngewthuh ïaki paidbah nongshong shnong ba kim dei ban ai lad ba u drok un kharoi ne un jyllei hynrei ki dei ban ïeng tylli ban iatreilang ban rat dyngkhong ia u drok
Haka jingïalang kaba la pynlong da ka ophis u Superintendent of Police, ïaka jingïalang la pynïaid da ka Kong CW Lyngdoh MPS, Dy Superintendent of Police, West Jaintia Hills District haka jingdonlang u Superintendent of Police West Jaintia Hills District u Chemphang Syrti, ki nonghikai bad ki khynnah skul na ki 7 tylli ki skul ha sor Jowai.
La ïoh ka jingbatai bniah halor ka jingma bad jingsniew jong u drok na u Dr. VD Sangahiwot Rymbai MPS Additional Superintendent of Police, West Jaintia Hills District kumjuh na ka Kong P Sumer Outreach Worker MCSWA bad na u H Syngkon uba la ai ka jingkren halor ka jingshem jong u bad kumno u lait naka jingkynjri jong u drok.
Ki nongkren ki la kren shaphang ka jingktah u drok ïaka koit ka khiah haka met ka phad, haka jingmut jingpyrkhat, ka jingktah ïaka imlang sahlang, ka ïing ka sem bad ka shnong baroh kawei bad kumjuh ruh ki lad jingïarap kiba lah ban ïoh lada don kiba ngop kum ha kane ka apot.
Haka prorkam kaba long ha Breakthrough De-Addiction and Rehabilitation Centre, KJP Synod Mihngi, la pynïaid da u Rev RK Sutnga haka jingdonlang ka District Social Welfare Officer West Jaintia Hills District, ka Kong J Synnah, Rev PL Pakma Executive Secretary KJP Synod Mihngi bad ki samla pule kane ka kolej.
U B. Kharmalki General Secretary ka Meghalaya User’s Furom ula iathuh halor ka jingïaid lynti jong u haka kam dih drok bad ki kyntien ai mynsiem la ioh na u Hame Shaniah Suiam u nongialehkai Kick Boxing kumno ban jop haka jingim khlem u drok.
Ka Kong J Synnah ka la batai halor ka Nashamukt Bharat Abhiyan, kaba dei ka skhim jong ka sorkar Kmie ban pynduna ïaka jingdih drok.
Ka laa ong ba u snem 2019 la don haduh 272 tylli ki District ha baroh kawei ka Ri India kiba la ñiew ba kidei kita ki District kiba kynrei palat ka jingdih drok bad kaba sngewsih ka long ba ka West Jaintia Hills District kadei kawei na kita ki District.
Ha u snem 2022 haka jaka ban duna ïa kita ki District kiba kynrei ha u drok hynrei ki kiew pynban sha ka 372 tylli bad ka East Jaintia Hills District ruh kadei kawei na ki District ba la ngop ha u drok.
Haka jingïalang la sam khusnam sha ki nongjop haka jingïakop Drawing bad la pynkut ïaka jingïalang da kaba pule ïaka pledge ba la lamkhmat da ka Kong Synnah bad ki kyntein khublei na u Co-ordinator Breakthrough Centre, Bah Shaphrang Dkhar.
Facebook
Instagram
Youtube
Twitter
Leave a Reply