Snohktilang ka AMPSTA ha ka Bharat Yatra bala khot pynlong da ka AIPTF halor kiba bun ki mat jingdawa

Syllad | The Rising MeghalayaAugust 31, 2023

Ka All Meghalaya Primary School Teachers’ Association (AMPSTA) kan iasnohkti lang ha ka jingiaid paidbah ne procession ba la tip kum ka “Bharat Yatra’ ba la pynbeit da ka All India Primary Teachers’ Federation (AIPTF) ka ban long ha ka 4 tarik u Nailur 2023 halor kiba bun ki mat jingdawa.

Kane ka jingiaid paidbah kan sdang napoh Community Hall Golf Link bad iaid lyngba ia surok iew Polo sha ka surok ha lyndet ka City Dhaba, sha MLA hostel bad mih sha State Bank of India lyngba ka ophis DC sha Nan Polok, Bivar Road bad phai biang sha ka jaka ba sdang ia ka jingialang.Kane ka jingiaid paidbah kan sdang naduh ka por 10 baje mynstep haduh ka 12:30 mynsngi.

Ka AMPSTA ha u kyrwoh lyngba u Bah FC Shullai General Secretary /AMPSTA bad u Secretary ka AIPTF ki la ong ba kane ka jingiaid paidbah ka long shibynta ban dawa na ka sorkar na ka bynta ban pynneh ha kaba iadei bad ka pension skhim, ka jingithuh ne regularize ia ka jingshakri jong ki nonghikai Lower Primary School, ka jingsiew ia ka 4th Installment 25% Revised pay jong ki nonghikai Dificit, ka jingsiew tista ia ka tulop jong ki nonghikai Deficit bad halor ka quality education.

Kumta na ka liang ka AMPSTA ka kyntu ia baroh ki nonghikai kiba la thung hadien jong ka 01.04.2010 ter ter bad ruh ki nonghikai deficit Lower Primary School Teachers ba kin wan iashim bynta lang ha kane ka jingiaid paidbah.

Ha kane ka sngi yn shim da ka shuti paidbah ne ka mass casual leave da baroh ki nonghikai. Na ka liang ki nongkitkam na ka head office jong ka Seng ki kyrpad ia baroh ki nonghikai ba kin ia poi ha ka jaka ban sdang ia ka jingiaid paidbah 15 minit shwa ka por.