Snohktilang ka Jowai ban rakhe iaka Republic Day | Pule iaka thong ka sorkar Jylla ban wanrah iaka roi ka par
Ka nongbah Jowai kala snohktilang bad ka ri baroh kawei ban rakhe ïaka 73rd Republic Day ha madan Jrisalein, Chutwakhu Jowai.
U Deputy Chief Minister ka Jylla Bah Prestone Tynsong ula pynher ïaka lama lai rong ka ri bad shim ruh Rashtriya Salute ha Jowai.
Katba u Ma Comingone Ymbon MLA Raliang bad u Ma Wailadmiki Shylla kila pynher iaka lama bad shim iaka Rashtriya Salute ha Shangpang bad Amlarem.
Ha Nongbah Shillong u Myntri Rangbah ka Jylla Conrad K Sangma ula shim iaka Rashtriya Salute.
Ha Jowai kala don ruh ka jingpyni nam ïaki 11 tableau ba la pynkhreh da ki tnad sorkar bapher bapher ha kaba iadei bad ki schemes sorka. La pynphuh pynphieng iaka jingrakhe da ka jingshad jingrwai tynrai kaba la shimbynta da ki kynhun bapher bapher.
Ka jingkren haka Republic Day 2022
Ha kane ka Sngi rakhe ia ka Republic kaba 73 bad ha ka lyngkhuh dap 50 snem jong ka jingioh ia la ka jylla Meghalaya, la ai khublei ia baroh ki nongshong shnong jong ka jylla.
Ha kum kane ka sngi, to ngin pynthymmai la ki kular ban bat skhem ia ka dor jong ka synshar paidbah bad ruh ban pynthikna ia ka ri kaba laitluid, kaba iaim kum shipara bad kaba iaryngkat kyrdan hapdeng ki nongshong shnong. Ha kane ka sngi to ngin kynmaw burom ia ki nongialeh laitluid kiba la pyjnioh ha ngi ia ka jinglaitluid. Ngin kynmaw tympang ia ki riewieit ri jong ka jylla Meghalaya, kum U Tirot Sing, U Kiang Nangbah bad Pa Togan N Sangma bad kiwei ki riewieit ri bad ai khublei ruh ia ki dkhot jong ki kynhun shipai, ki Paramilitary Force bad ki pulit kiba la aiti ialade ha la ki kam ban wanrah ka jingshngain ia ki paid nongshong shnong.
La phiah ia ka Meghalaya na ka Assam kum ka Autonomous State ha u Iaiong 1970 bad la pynbna kum ka jylla bapura ha ka 21 Kyllalyngkot, 1972. Ha kine ki 50 tylli ki snem ka jingiaid lynti jong ka jylla, ngi la sakhi ia ka jingkiew shaphrang ha baroh ki liang bad ngi la iohi bun ki jingkylla bad ka roi ka par. Haba ngi rakhe ia une u mawmer uban sah kynmaw ha ka histori jong ka jylla Meghalaya, nga shim ruh kane ka kabu ksiar ban ai khublei ia ki paidbah ka jylla ha kane ka jingrakhe ia ka Jubilee Ksiar. Haba ngi lehkmen ia ki mawmer, ngi dei ruh ban phaidien sha kito ki snem ban kynmaw bad ai burom ia ki nongialam Hill State bakhraw jongngi kiba la ialeh ban pynioh ha ngi ia ka jylla bapura. Ka jingiohi jngai bad jinglen lade jong ki ka la pynioh ha ngi ki longdien ia la ka jylla kaba ngi lah ban kam nongkynti kum ka lajong.
Haba ianujor ha kine ki 50 snem ki pyni ba ka jylla jong ngi ka la kiew shaphrang ha baroh ki liang, kum ka nuksa, ha ka snem 1971, ka jingdon ki nongshong shnong ka long tang 10,11,699 ngut bad haduh ka snem 2021, ngi don jan 34 lak ngut. Ka jingshong ki briew ha man ka shi sq.km ka la kiew sha ka 132 ngut ha ka snem 2011 na ka 45 ngut ha ka snem 1971. Ka jingdon kiba la nang la stad ka la kiew sha ka 74.43% ha ka snem 2011 na ka 29.49%. Kumjuh, ka jylla ka la iohi ia ka jingnang kiew ha kiwei ki tnat treikam kum ka Health, Agriculture, Power, Tourism, Road and Communication. Ka lynter jong ka surok bah National Highway ha ka jylla ka la palat ia ka 1100 Km mynta haba ianujor bad tang 150 Km ha ka snem 1972. Ka jingpynmih bording ha ka jylla ha ka kiew da palat 500% na ka 60 MW sha ka 353 MW mynta.
Ha ka snem 2021-22, ka jinglong jingman ha ka jylla ka long kaba shongsuk. Ngi la ioh ban rakhe ia ki tamasa bapher bapher kynthup ia ki Sngi Khraw khlem don jingthut. Ngi angnud shisha ban pynbeit ia ka jingiakajia pud hapdeng ka Assam bad Meghalaya ban wanrah ka jingshong suk bad ka roi ka par ia ki paidbah jong ngi kiba shong ha ki thain khappud. Ban poi sha kane ka thong bad da ka jingthrang ban pynkut ia kane ka jingiakajia, ki Myntri Rangbah jong ki ar jylla ki la iakynduh bunsien ha kine ki hynriew bnai ba la lah. Ki Committee ki la leit ban jurip ia ki jaka ryngkat bad ki Regional Committee na Assam bad pynlong ka jingiasyllok bad ki briew kiba sah ha kine ki shnong, ki khlieh nongsynshar shnong, ki District Council bad kiwei. Ki Myntri Rangbah jong ka Assam bad Meghalaya ki la iakynduh ia u Myntri ki Kam Pohiing ka India ha ka 20 Kyllalyngkot 2022 ha New Delhi ha kaba la aiti ia ka kaiphod ia ka ban sa bishar sani da ka tnat Pohiing ka India.
Ka jingpynbiang ia ki jingtei jingshna kum ki surok, ki jaka sumar, ki jingring umdih bad ka bording ki lah ban kyntiew ia ka ioh ka kot ka jylla. Ha kaba iadei bad ki surok, ka jingpyniar bad jingpynbha ia ki katto katne ki surok ha ki distrik hapoh ka Integrated Transport Projek kaba bei tyngka da ka World Bank ha ka jinglut kaba 1100 klur ka la nang iaid shaphrang. Ngi la lah ban shna 1200 Km ki surok nongkyndong hapoh ka PMGSY ha kine ki laisnem. Ha kine ki shisnem ba la lah, ka sorkar jylla ka la shna haba khein kyllum 60 km ki surok man u bnai.
Ka sorkar ka angnud bad ka trei shitom ban pynthikna ba ki paid nongshong shnong ki ioh ia ka umbam umdih bakhuid ha khyrdop jingkhang. Ngi la shim ia ki lad ban buh ia ki kor um ha man ki longing ha ki thain nongkyndong hapoh u Nohprah mynta ka snem hapoh ka Jal Jeevan Mission Scheme. Katba ha ka snem 2019, tang kumba 4500 tylli ki longing ki ioh ia ka umkor, mynta ngi la lah ban pynkiew sha palat 2 lak tylli ki longing. Ngi dei kawei na ki artylli ki jylla ha India kiba la leh bha ha kane ka liang bad ngin nang trei shitom ban kdup ia baroh ki longing haba kut kane ka snem.
Ha kaba iadei bad ka tnat ka Koit ka Khiah, ka sorkar jylla ka la sdang ia ka Meghalaya Health Systems Strengthening Project kaba bei tyngka na ka World Bank ban pynlut kumba 350 klur ha ki san snem ban wan ban kyntiew ia ki jaka sumar ha ka jylla. Ha ka bynta banyngkong, yn pynbiang ia ki tiar ai jingsumar ha ki 156 tylli ki jaka sumar kaban kynthup ia ka jingbuh ia ki tiar sumar kiba thymmai ha ki district jong ka jylla. Hapoh kane ka projek yn sdang ruh ia ki jingpyndonkam ia ki drone ban pynkit ia ki dawai ha ka por ba kyrkieh. Ka thong jong ka projek ka long ban pynjlan ia ka rta jong ki nongshong shnong jong ka jylla na ka 62.7 snem haba khein kyllum ia ka rta im jong ki briew ha ka jylla sha ka 72 snem. Ki jaka sumar kiba thmu ban plie ha ka snem 2022-2023 ki kynthup ia ka Jowai MCH ha West Jaintia Hills, Nongstoin MCH ha West Khasi Hills bad ka hospital 100 jingthiah ha Khliehriat ha East Jaintia Hills, Lawbah PHC ha East Khasi Hills, Marmain PHC ha Ri Bhoi bad Kasiabari PHC ha West Garo Hills.
Ha ka liang ka tnat Power, kum shibynta jong ka North Eastern Region Power System Improvement Project kaba la pyntreikam ha Meghalaya, la dep ban buh 33/11 KV ki Substation ha Chibinang, Mawpat, Raksamgre, Mawkynrew, Sutnga. La lah ruh ban pyndep ia ka jingpynkhlain ia ka 33/11 KV Substation kaba don mynta ha SE Falls Substation, Phulbari bad ka 33 KV Line Extension na Jongksha sha Mawkynrew ryngkat bad ka Bay Extension ha Jongksha. Hapoh ka jingbei pisa ka Asian Development Bank, ki jingtrei kiba dang iaid shakhmat ki long ka jingbuh bad jingpyniar ia 69 tylli ki 33/11 KV Substation ha Meghalaya, ka jingbuh ia ki 33KV & 11KV line bad ka jingpynkhlain bad jingbujli ia ki 33KV & 11KV Lines and Metering ia ki nongpyndonkam bording kiba shi phase bad lai phase. Kane ka projek kan pynkhlain bad pynthymmai ia ka rukom sam bording, pynduna ia ka jinglutksan bad pynbha ia ka rukom sam bording ha ka jylla. Ngi kyrmen ba ka Ganol Hydro Electric Project yn sa lah ban pyndep noh bad yn sa aiti noh mynta ka snem ka ban iatyngkhuh bad ka jingrakhe ia ka Jubilee Ksiar jong ka jylla.
Ka sorkar jylla ka angnud ban pynbiang phon pisa na ka bynta ban pynbiang ia ki jingdonkam baroh. Ka NABARD Infrastructure Development Assistance ka dei ka shlem ai ram kaba la saindur ban ai phon pisa na ka bynta ban kyntiew ia ki thain nongkyndong. Ka sorkar jytlla ka tyrwa ban bei tyngka ia ki projek ba kongsan lyngba ka NIDA bad ka la jied ia ka MIDFC kum ka Special Purpose Vehicle ban pynioh ia ki phon na ka bynta ki projek kiba la mang hapoh ka NIDA. Haduh mynta, la phah 253 tylli ki projek ha ka jingmang pisa kaba 1326.92 klur tyngka.
Ka jingtrei ia ka Meghalaya Legislative Building bathymmai ha New Shillong ka la iaid shakhmat bad la khmih lynti ban pyndep mynta ka snem. Da ka jingthmu ban pyniar ia ka New Shillong, ka tnat Urban Affairs ka la shimti ia ka jaka kaba don 807 haktar ha Mawpdang, Mawkhanu. Ngi kyrmen ban pynlong ia kane ka thain ka shlem treikam jong ki tnat bapher bapher ka sorkar jylla bad sorkar pdeng. Hapoh ka Shillong Smart City, ka jingtei thymmai ia ka iew Laitumkhrah, ka jingtei ia ka Iew Polo, ka jingtei ia ki top pynlang umslap ha ki katto kante ki shnong ha ka nongbah, ka jingpynkhuid ia ka Wah Umkhrah bad ka jingtei ia ka Tourism & Cultural Centre ha Police Bazar ka dang iaid shaphrang.
Ka tnat Tourism ka dei kawei pat ka tnat kaba hakhmat bha kaba lah ban kyntiew ia ka ioh ka kot jong ka jylla. Ka thong jong ngi ka long ban kyntiew ia ka jingnoh synniang na ka Tourism sha ka GSDP na ka 3% kaba long mynta sha ka 15% ha kine ki shiphew snem ban wan. Ngi lah ban leh ia kata bad ka sorkar ka la bei tyngka jur sha kane ka tnat kaba lah ban ai ki kabu ioh kam ioh jam khamtam ia ki samla. Kaba kham paw na kine ka long ka jingpyntrei ia ka Meghalaya Eco Tourism Infrastructure Development Project, ka projek bei tyngka nabar hapoh ka New Development Bank ha ka jinglut kaba 750 klur ban buh ia ki jingtei kiba pawnam ha ki katto katne ki jaka jngoh kai kum ha Sohra, Shillong, Tura bad ki jaka sah ha ki shnong kum ka Kongthong. Nga sngewsarong ban iathuh ba ka shnong Kongthong ha East Khasi Hills ka dei kawei na ki laitylli ki nongrit kiba la shah jied na India na ka bynta ka United Nations World Tourism Organisation Best Tourism Village Award. Ban pynpaw pyrthei ia ka kolshor bad ki sap tynrai jong ka jylla, ka Tourism ka la sdang ia ka Meghalayan Age Store ha ka nongbah New Delhi ha ka 9 tarik Nohprah, 2021. La pynlong ia ka Meghalaya Locality Beautification and Enhancement Competition ban pynkhieim biang bad pynitynnat ia ki shnong ki thaw ha ka jylla. Ngi la pyllait pisa sha ki shnong lyngba ki Deputy Commissioner ban pyntrei ia ka kam airong airup bad ka jingpynbha ia ki kynroh bad ki madan bad ban dro dur dro rup ha ki kynroh bad kiwei. Shuh shuh, da ka jingthmu ban tei 500 tylli ki homestay ha kane ka snem mang tyngka, la sdang ia ka Meghalaya Homestays Scheme da kaba pyniasnoh lang ia ka skim bad ka Prime Minister Employment Generation Programme.
Ha kaba iadei bad ki shnat treikam ba hakhmat eh, ka tnat Agriculture ka dei ka tnat kaba kyntiew ia ka ioh ka kot bad ngi angnud ban kyntiew ia ka bha ka miat jong ki nongrep. Ka sorkar jylla ka la sdang ia ka prokram FOCUS – Farmers’ Collectivization for Upscaling of Production and Marketing Systems ban iarap pyniaid iew ia ki mar bad ai jingiarap pisa ia ki nongrep. Hapoh kane ka prokram, ka sorkar ka thrang ban iarap ia ki nongrep kiba long u budlum ka ioh ka kot ha ki thain nongkyndong da kaba thaw ia ki Producer Group (PG). Haduh mynta, ngi la lah ban seng kumba 3500 tylli ki Producer Group kaba kynthup ia ki nongrep na kumba 46000 tylli ki longing. Ha kaba ka Jubilee Ksiar, ngin trei shitom ban kdup ia baroh 4.5 lak ki longing nongrep jong ka jylla. Ngi kyrshan ruh ia ki SHG kiba long ki shnat kiba lah ban pynkupbor ia ki kynthei ha ka ioh ka kot ne ha ka imlang sahlang. Tang hapoh lai snem, ngi la seng palat 28000 tylli ki SHG kaba long san shah na ka 5500 tylli ki SHG kiba ngi don ha ka snem 2018.
Ka tnat Sericulture and Weaving ka don ka bynta bakongsan ha kaba rat diengkhong ia ka jingduk. Ka dei ka tnat kaba pynmih ki kabu iohkam iohjam khamtam ia ki kynthei. Dang shen la buh ia ka Design Innovation Resource Centre da ka jingiatreilang bad ka NIFT ban pynpaw pyrthei ia ki jain ryndia ha ka Eri Silk Village at Raid Nongtluh, Umden Diwon. Ka jingtrei ia ka Integrated Textiles Tourism Complex ha Nongpoh ka la jan dep.
Ka tnat Community & Rural Development ka iai bteng ban pyntreikam ia ki prokram rat diengkhong ia ka jingduk ha ki thain nongkyndong. Ha ka MGNREGS, ka Meghalaya ka don ha ka kyrdan balai na ka jinglah ban pynmih ia ki kam. Mynshem snem ngi la lah ban thep pisa T. 14500/- na ka bynta man ki longing ha nongkyndong ban pyntreikam ia kane ka prokram. Hapoh ka Pradhan Mantri Awaas Yojana (Grameen) (PMAY-G), ha ka snem 2021-22, la pynlut 5408 lak bad la lah ban shna pyndep 6640 tylli ki iing.
Ka tnat Fisheries ka dei kawei na ki shnat ba kongsan tam na ka bynta ki thain nongkyndong. Ka jingpyntreikam ia ka bynta ba-ar jong ka Meghalaya State Aquaculture Mission ka la lah ban kyntiew ia ka jingpynmih dohkha na ka 12329.851 MT ha ka snem 2016-17 sha ka 16123 MT ha ka snem 2020-21. Ka jingpynmih ia ki symbai dohkha ka la kiew na ka 8.82 milian ha ka snem 2016-17 sha ka 13.79 milian ha ka snem 2020-21.
Ka sorkar Meghalaya ka la ialeh ban pynkiew stet ia ka pule puthi ha ka jylla. Ka Shillong Government College of Engineering bad ka College of Architecture & Urban Planning, Tura kan sdang treikam noh mynta ka snem. Shuh shuh la buh ia ki Model Degree College bathymmai ha Patharkhmah bad Rongjeng. Ka jingtrei ka dang iaid shaphrang ban pynkylla ia ki degree college sha ki Model Degree College, kata, ka Nongtalang College, Nongtalang, Mendipathar College, Mendipathar bad Sngap Syiem College, Mawkyrwat. Ka jingtrei ia ka Capt. Williamson Sangma Technical University ha Tura, ka Technical University ba nyngkong eh ha ka jylla ka la iaid shaphrang ha kaba ka jingtrei ka la dep 90%. Ka plan ban buh ia ki residential school hapoh ka shatri jong ka EMRS ka dang iaid shakhmat.
Hapoh ka Pradhan Mantri Garib Kalyan Yojana (PMGKAY), ka sorkar jylla ka iai bteng ban ai tam ia u khaw ha ka jingthew kaba 5 kilo shi khlieh briew shibnai khlem donkam siewdor naduh u Jymmang 2021 haduh u Naiwieng 2021 ia baroh ki nongioh myntoi kiba la kdup hapoh ka National Food Security Act. Ka tnat ka la pyniaid ryntih ia ka rukom sam rashon da kaba pyntreikam ia ka Fair Price Shop Automation Project ha kaba la buh 4733 tylli ki electronic point of sale (e-POS) ha baroh ki dukan rashon ha ka jyklla. Ka sorkar jylla ka la lah ruh ban pyntyllun ia ka One Nation One Ration Card.
Ngi sngewsarong ia la ka kolshor bad ka dustur riti kaba riewspah jong ka jylla bad ka sorkar jylla ka angnud ban kyntiew ia ka sap ka phong tynrai bad ka kolshor. Ka jingtei ka ka Shillong International Centre for Performing Arts & Culture ka la jan dep bad yn sa lah ban pyndonkam shen. Ka jingtrei ka dang shakhmat ia ka Tribal Research Institute ha Chidekgre (Babadam) ha West Garo Hills bad ynda la dep, kane ka jingtei kan long ka jaka wad bniah ym tang ia ka jylla hynrei ia ka thain shatei lam mihngi baroh kawei.
Ka tnat Transport ka la wanrah bun ki skim bad prokram ban kyntiew ia ka leit ka wan ha ka jylla. Ka long kaba donkam ba ngin pyniasoh na suin sha kiwei ki bynta jong ka ri khamtam ha ka liang ka leit ka wan bad ka jingkyntiew ia ka kam jngoh kai. Ia mynta, ka kad liengsuin ka pyniaid 8 tylli ki jingleit da ka liengsuin kaba pyniasoh ia ka Kolkata, Guwahati, Aizawl, Agartala, Dimapur bad Imphal. Ngi khmih lynti ba ngin lah ban pyniaid shuh shuh ia ki liengsuin ban pyniasoh bad kiwei ki thain. Dang shen la dep buh mawnongrim ban tei ia ka Inspection & Certification Centre ha MTC Workshop ha Shillong. Kane kan iarap ban test da ki kor ki bor ia ki kali.
Ngi sngewsarong ia ka jingriewspah jong ngi ha ka liang ki khlaw ki btap bad ka sorkar jylla ka thrang ban sumar bad tyngkai ia ki khlaw bad ki spah mariang ban kyntiew ia ka ioh ka kot. Ha ka snem 2021-2022, ka sorkar jylla ka la pynkhreh ia 19 tylli ki skim sumar ia ki khlaw shnong bad khlaw shimet ha kaba ka jingheh ka long 1797 haktar. Ban pynkhieim biang ia ki jaka ba don ki par dewiong ki bym pyntreikam shuh, hapoh ka MEPRF ngi la lah ban pynmih 9 lak ki tynrai dieng bad 2 lak tynrai la ioh ban sam sha ki paidbah. Ka jingtrei ia ka Meghalaya State Zoo, Umtrew, Ri Bhoi ha ka jingmang pisa kaba 35 klur ka la iaid shakhmat bad la khmih lynti ban pyndep shen. Khnang ban tyngkai, iada bad pyndonkam adkar ia ki spah mariang ha ka jylla, ka sorkar ka la pyntreikam ia bun tylli ki kyndon ain hapoh ka Meghalaya Forest Regulation, 1973.
31% na ki nongshong shnong ka jylla ki dei ki samla bad ban pynbiang ia ki jingdonkam bad jingangnud jong ki, ka sorkar jylla ka la mynjur ia ka Meghalaya Youth Policy ha u Nailur 2021. Ka policy ka dei kaba la saindur ban iarap ia ki samla ba kin lah ban pynurlong ia ki jingthmu jong ki kynthup ha ka liang ka kam ialehkai. Ngi donkam ki jaka ialehkai kiba paka ba kyntiew ia ki sap ialehkai jong ki. Kumta ka jingtei ia ka P.A. Sangma Integrated Sports Complex ha Tura ka la iaid shaphrang bad ka jingtei ia ka Indoor Stadium ha 5th Ground ha JN Complex ha Polo Ground, Shillong kan sdang noh mynta ka snem. Ka sorkar kan sdang ruh ia ka prokram kyntiew ia ki samla ha kaba 10000 ngut ki samla kin shah hikai ha ki sap treikam bad kyntiew ia ki sap ba ki don.
Ka jylla ka buh hakhmat eh ia ka thong ban kyntiew ia ka synshar khadar. Ka sorkar jylla ka la pyntreikam ia ki skim ban pynsuk ha ka iatrei iaktah. Ka jylla ka la shim khia ruh ban pynbeit bad weng ia kito ki jingeh kiba don ha ka jingpyntreikam ia ki kam pynroi. Dang shen ka NITI Aayog ka la ai jingiaroh ia ka jylla ba ka dei kawei na ki jylla ka thain Shatei lam Mihngi kaba la leh bha ha kaba pynsuk ia ki jingiatreikam.
Ka sorkar Meghalaya ka angnud ban pynurlong ia ki thong jong ka roi ka par kumba la saindur da ka United Nation Sustainable Development Goals (SDG) Agenda 2030. Ka jylla ka la sdang kiew ha ka liang ki kam pynroi jong ka kumba ka paw ha ka SDG India Index kaba la pynmih man ka snem da ka NITI Aayog. Ka jylla ruh ka la sdang ban ai kyrdan ia ki District katkum ka jingpyntreikam ia ki kam pynroi bad ka pynkhreh ia ka District Level SDG Action Plan ban peit ia ki kam pynroi kiba don hakhmat bad ban pyllait ia ka phon pisa sha ki Deputy Commissioner ba kin nang pynkhlain ia ki kam pynroi ha ki distrik.
Facebook
Instagram
Youtube
Twitter
Leave a Reply