Snohktilang ka ophis DHO-WJH haka jingrakhe ia ka “National Handloom Day” ha Mukhap

Syllad | The Rising MeghalayaAugust 8, 2023

Ka ophis District Handloom Officer, West Jaintia Hills District kaba hap hapoh ka  Department of Textile, Directorate of Sericulture and Weaving ka sorkar jylla kala iasnohktilang haka jingrakhe ia ka “ National Handloom Day” ha ka prokram kaba la long ha Mukhap CFC cum  Production Centre, West Jaintia Hills District haka sngi Nyngkong

Ha kane ka prokram la wan ia don lang ruh u MLA ka thain u Ma Nujorki Sungoh kum u Kongsan bad u Deputy Commissioner Bah Batlang S Sohliya kum u Symbud Kongsan.

Haba kren ha ka jingialang u MLA u la ong ba watla ngi ai ka jingiaroh ia ka kolshor jong ki ri sepngi bad bud ruh halor kiba bun ki bynta na kiwei pat ki ri kiba lam sha ka jingkiew shaphrang, hynrei ha kajuh ka por ula ong ba ym dei ban klet noh pat ia la ka jong ka tynrai kaba pynwandur bad pynithuh ia ka tynrai bad ki jingdon jingsap ki jong ngi. Ka jingshisha ka long ruh ba ka donkam ban peitthuh na kiwei pat ban ioh jingtip jingnang bad lehkmen ia la ka tynrai kaba ngi hiar pateng kan long ka nuksa ba bha ban kiew shaphrang.

Nalor kata u MLA ka thain u la kdew ruh ba na ka liang ka sorkar Meghalaya ka la pyntreikam ia ki polisi bapher bapher bad plie ruh ia ki lad ki lynti bapher bapher na ka bynta ban kyntiew bad pynneh pynsah ia ka kolshor tynrai ka jylla, bad kane ka jingpynneh pynsah kum kine ki kam shna kti bad thain jingthain hapoh ka district ka jong ngi kan plie lad plie lynti ha ka liang ka ioh kam ioh jam na ka bynta kiba bun ki samla.

Ha kane ka jingialang la ioh ruh ka jingkren na ka Deputy Director ( Weaving) Kong MR Lywait kaba la pynpaw halor ka jingthmu ba kongsan jong kane ka sngi, da kaba pyntip ruh ba ia ka National Handloom la rakhe man ka snem ha ka 7 Tarik u Nailar ban kynmaw burom ia kiba kum kine ki nongshong shnong.

Kiwei pat kiba la ai jingkren ki kynthup ia u Deputy commissioner Bah Batlang S Sohliya, BDO Laskein C& RD Ma B Niang, MDC ka thain Bah W. G Sungoh nalor kiwei pat.

Rakhe ka tnat Textile ia ka “National Handloom Day 2023” ha ka jylla, sam iaki khusnam sha ki kynhun bad ki riew shimet ba tbit pynmih tiar

Kumban shu iathuh haka prokram kaba long ha NIFT Shillong, ka khusnam Best Co-operative Society kala leit sha ka Mukhap Handloom & Handicraft Co-operative Society, West Jaintia Hills District.