Soi ka Shillong Lajong ia u midfielder ba tbit u Damaitphang Lyngdoh

Syllad | The Rising MeghalayaSeptember 8, 2023

Ka Shillong Lajong Football Club (SLFC) mynta ka sngi ka la pynbna halor ka jingsoi ia u rangialehkai midfielder ba tbit uba dei u trai shnong u Damaitphang Lyngdoh 19 snem rta uba shong ba sah ha ka thain Umlyngka, East Khasi Hills.

U Damaitphang u la iasoi ia ka jingiateh kontrak kaba ar snem bad kane ka kynhun, bad kaba dei ruh ka jingwanphai ka jong u shapoh ka club hadien ka jingseisoh kaba u la sakhi hapoh ka Bengaluru FC.

Ia u Damaitphang Lyngoh uba dei u midfielder la tip bha halor ka sap ialehkai ba kyrpang kaba u don haba u mih madan. U dei ruh uba la shemphang bha ha ka jingiaid lynti lyngba ka jingiashim bynta ha ki tournament kum ha ka Indian Super League (ISL), AFC Cup Qualifiers, Durand Cup, bad ha kiwei kiwei pat ki tournament.

Lah ban kdew ba ha ka por ba ula don bad ka Bengaluru FC, u Lyngdoh u la ioh ia ka jingjop kaba khraw lyngba ka jingioh rah kaba arsien kynthih ia ka nam lahduh ha ka “Reliance Foundation Development League” ha ka samoi ialehkai jong ka snem 2021/2022 bad 2022/2023.

Ia ka jingtbit ha ka rukom ialehkai jong u haba u mih madan ym lah satia ban len namar u la ioh pdiang ruh ia ka khusnam “2020/2021 Upcoming Player of the Season” kata shibynta jong ka “BFC Club Awards.”

Kumta ruh na ka liang ka Shillong Lajong FC ka pynpaw ka jingkmen kaba khraw ia kane ka jingwanphai pat jong u Damaitphang Lyngoh sha ka club ha ryngkat ka jingkyrmen kaba skhem ba ka jingdon ka jong u kan nang pynkhlain shuh shuh ia ka kynhun midfield bad ka ban wanrah ia ka jingjop.

Kane ka la wan long ruh khyndiat sngi hadien ba ka SLFC ka la soi ia u rangialehkai ba midfielder pawkhmat na Brazil u Renan Paulino De Souza uba la ju mihkhmat na ki club ba pawkhmat kum ka Athetico Paranaense, Náutico, Bragantino.

U De Souza u dei ruh uba la lah ban pynpaw ia ka sap ialehkai jong u ha ki tournament kum ka ‘Brazilian Serie A Championship’ bad ka ‘Brazil Cup.’ Kumta ruh ha ka rta 28 snem u Ranan un long da shisha ka jingjop kaba khraw na ka bynta ka Shillong Lajong.