Soo sngi Lee ïaw

C. Pynsakhiat Yeini KyndiahJuly 3, 2020

Hawa biang ka niam katkam ka Hukum,
Hajrong ka Adong waman ka Dustur.
Wa sikai ïow bru wow tip ïow Blai,
Ka luti I suk ha sla pyrthai.

Soo sngi Lee ïaw kine de dapoi ki,.
Dasmur I chnong I thaw ïong ka Boom ka Bhuri,
Ïa ka niam Chad Behdieñkhlam u pdiang ika,
Na ïung ha lait deiwa khooid wa suba.

Nadooh narim wa pynkyntang pynsarot,
Hajrong ki hukum Adong u Tre-kirot.
Wow burom makhane sa ïa ki Blai chnong Blai thaw,
Ïa kiwa dadep pynchong hajrong ka Bei Rym-aw.

Ha’u ni u 2020 won daman kamni,
Dasah khanatang ha akher ki sngi.
Wapoor ka khlam waroh ka pyrthai,
Sñiaw kamwa datkoh ki Hukum Adong Blai.

Ïa ki aiñ sorkar hap duk I u Kohngooh,
Han ladymioh I u ïa chad kamwa jooh.
Wymem iwa tymbuiñ iwa duna,
Sarin ka niam da pyndep hi I kamwa nachwa.

I ngooh I dem waman I swar Blai,
Na’u thylliej Ksiar uwa dadep sai.
Ka Behdieñkhlam kam I pyrtuit ïong ka,
Ïoh sakhiat ko u panang ïa kani ka chitom saja.

Ïa ka Behdieñkhlam daleh da ki khon ka niamtre,
Ryngkat ki kaam niam wa pyndep wa e.
Wow paan naki Blai ïei kyrkhu khyrdoh,
Han ïa pher I hei ngeit ïow ïa chait lang I waroh.