Sospon ka Congress ia 2 ngut ki MLA; kynnoh ba pyndonkam ka NPP da ka pisa beain ban pynjot ia ka Congress

Syllad | The Rising MeghalayaAugust 17, 2024

Ka Meghalaya Pradesh Congress Committee (MPCC) ha ka 16 tarik ka la sospon noh mardor ia ki arngut ki MLA jong ka kiba kynthup ia u Bah Gabriel Wahlang (Nongstoin) and Charles Marngar (Mawhati) halor ka jingkynnoh leh pyrshah party ka jong ki, kata da kaba kynnoh ruh ia ka sorkar MDA ba la ialam da ka National People’s Party (NPP) halor ka jingpyndonkam da ka pisa beain ba la lum na u drok, jingtih dewiong bad ki kam kontrak ban pynjem khnap ia kiwei pat ki party sain pyrthei.

Ha ka shithi ba la phah da ka General Secretary ka MPCC ka Kong Wansuk Syiem sha kine ki arngut ki MLA ka la ong, “Kumba la bthah da ki bor kiba halor la pyntip ba la sospon mardor ia phi na ka Indian National Congress (INC) na ka bynta hynriew snem bad tad haduh ban da pyntip da kumwei pat namar ka jingdonkti ka jong phi ha ki kam ialeh pyrshah ia ka party.”

U MLA ka Umsning u Dr Celestine Lyngdoh uba dei uwei napdeng ki laingut ki MLA kiba la paw pyrthei halor ka jingthmu ban leit pyniasoh sha ka NPP u la ia donlang ha katei ka jingialang jong ka MPCC.

Kham hashwa hadien ka jingialang, u president ka MPCC u Bah Vincent H Pala u la ong, “Ngi la khot ia baroh laingut ki MLA. Hynrei tang u Dr Celestine u ba la wan bad pynshai ha ngi. U la ong ba kim pat leit satia kumba ka long mynta hi, ngi dang ia pyrkhat namar ka don ka jingtyrwa na ka NPP na ka bynta kiba bun ki skhim kam pynroi. Kum ka nuksa, ki la tyrwa ia ki da ki Block, ki surok bad bun kiwei pat ba kin wan iasoh bad ki, hynrei u la pyntip ba kim pat shim rai satia bad dei na kata ka daw ba u la wan ban pynshai sha ngi.”

Haba kynthoh pyrshah ia ka sorkar MDA ba la ialam da ka NPP, u Bah Pala u la kynnoh ba ka Sorkar ka la pyndonkam da ka pisa beain ban khroh ia ki MLA ka Congress lem bad kiwei pat ki party.

Kumjuh haba pynpaw ba ka don ka jingpyrshang borbah da ka BJP-NPP ban pynjot thiaw ia ka Congress, u Pala u la ong, “Ki tip ba ka jingsngew jong u paidbah ka don bad ka Congress mynta, kata ym tang ha ka Jylla hynrei ha ka ri India baroh kawei. Ki pyrkhat ba da kaba shim noh ia ki MLA bad ki, kin lah ban pynjot ia ngi khamtam ha ka elekshon na Gambegre bad MDC kumjuh.”

Nalor kata u la pyntip ba ka party ka la ai ka jingmaham kaba tyngeh pyrshah ia ki MLA ba kan leh da kaba tyngeh pyrshah ia ki lada ki leit iasoh sha kiwei pat ki party.

Lah ban kdew ba ha kine ki khyndiat sngi ba la dep ka kyrteng jong u Bah Gabriel Wahlang bad Bah Charles Marngar, kila mih lem bad uwei u MLA ha kaba la kam ba ki lah ban leit pyniasoh noh sha ka seng NPP, kata hadien ka jingrakhe ia ka Independence Day. Kine ki arngut ki MLA ka Congress ki dei ruh ki MDC ka Congress hapoh Khasi Hills Autonomous District Council (KHADC).