Sospon ka VPP ia u MLA ka North Shillong bad 4 ngut kiwei pat namar ki kam ialeh pyrshah seng

Syllad | The Rising MeghalayaMarch 29, 2025

Ka Voice of the People Party (VPP) ha ka 28 tarik Lber ka la sospon ia u Nongmihkhmat jong ka na North Shillong, u Bah Adelbert Nongrum na ka bynta lai snem ha ryngkat bad sawngut kiwei pat ki dkhot namar ki kam ialeh pyrshah seng.

Ia kane ka rai la shim hadien ba ka State Executive Committee jong ka party ka la bishar bniah ia ki jubab jong u MLA lem bad saw ngut kiwei pat ki nongialam kiba kynthup ia u Bah Snarbor Laloo, Imti Jamir, Wilstone Sohshang bad u Richinbusiness Marwein ia ka jingpan jingpynshai ba la ai sha ki ha ka 1 tarik u Lber.

Ha ka shithi sha u Bah Adelbert Nongrum, u Vice President ka VPP u Dr Kara H Shen u la ong, “La iohi ba ka jubab jong phi ha ka jaka ban pynpaw ia ka jingbynniaw ne ban pdiang ia ka jingsngewkhia ba la pynpaw, ka long pynban kaba pynksan, kaba ialeh pyrshah bad kam don kano kano ka dak jong ka jingbabe halor ki jingleh kiba ktah pynban ia ka party. Ka sienjam ba phi la shim ban jubab ia ka jingpan jingpynshai ka nangpynpaw shuh shuh ia ka jingialeh pyrshah ia ki kyndon jong ka party ia kaba ym lah satia ban shu iehnoh.”

“Hadien ba la iathir bniah, ka party ka shem ba ka jubab jong phi kam long kaba pynhun, bad haba pyndonkam ia ka bor jong ka katkum ka Article III, Clause 5 jong ka Constitution ka Voice of the People Party, kumta ruh la sospon ia phi mardor na ka party na ka bynta lai snem,” u la bynrap.

“Hapdeng kane ka jingshah sospon, phin ym lah ban bat ia kano kano ka kam, ka jingkitkhlieh, ne ka hok ban long dkhot hapoh ka party. Phim dei ban mihkhmat ia ka party ha kino kino ki f ha kino kino ki rynsan lane ki rynsan paidbah.La kyntu ia phi ba phin kiar na kino kino ki kam kiba lah ban pynsniew dur shuh shuh ia ka party.”

Ha ka shithi sha ki saw ngut ki dkhot kiba la shah sospon, u Dr Kara Shen u la ong, “Hynrei, ha ka jaka ban pynpaw halor ki jingeh ba la pynpaw, ki jubab jong phi ki long kiba pynksan, kiba ialeh pyrshah bad khlem kano kano ka jingpdiang ia ka jingleh bakla ne ban sngew babe.Ka party ka shem ba ki jingpynshai jong phi ki dei ki bym sngewhun bad ki bym lah ban pdiang.”

Kumta, katkum ka Article III, Clause 5 bad Article XII jong ka Constitution ka Voice of the People Party (VPP), la sospon ia phi mardor na ka party, katba dang ap ia ka rai kaba kham bniah na ka State Executive Committee.”

“Hapdeng kane ka por ba la sospon phi dei ban sangeh ban bat ia kino kino ki kam ne jingkitkhlieh hapoh ka party. La khang pyshah ia phi ban mihkhmat ia ka party ha kino kino ki rynsan ne rynsan paidbah. La khmih lynti ba phin kohnguh ia ka rai jong ka party bad ban kiar na kino kino ki kam kiba lah ban ktah ia ka jingjanai bad ka burom jong ka party,” u la bynrap ha ka shithi.