Suba sahkut haduh 27 ngut ki nongtrei hapoh ka krem dewiong ha Umrangso, Assam

Syllad | The Rising MeghalayaJanuary 6, 2025

Kiba bun tylli ki khubor ki la mih ha kaba iadei bad ka jingdon jong ki nongtih par kiba la sahkut hapoh ka krem dewiong kaba ngat ha ka jingshlei um ha Umrangso kaba hapoh Dima Hasao district ka Assam.

Ki tyllong khubor ka thain ki la kam bad haduh 27 ngut ki nongtih dewiong ki la sahkut hapoh ka krem dewiong No. 19 ha 3 Kilo, Umrangso haka step 6 tarik Kyllalyngkot, hynrei 10 ngut na ki, ki la ioh lait im. Mynta la ong ba ki dang don hapdeng 13 haduh 17 ngut kiba dang sahkut shapoh jong kane ka krem dewiong.

Kane ka jingshlei um la iathuh ba ka la sdang naduh ka por 7 baje mynstep bad kaba la tuid sha kane ka krem dewiong kaba la pynlong ia kine ki nongtih dewiong ba kin sahkut shapoh.

Katba ki bor jong ka Tnad District Disaster Management Authority (DDMA) kim pat shym la ai ia kano kano ka jingpynthikna halor kane, hynrei ki heh ba dei khmih ki la pynpaw ba na ka liang u Deputy Commissioner u la pynlong ka jingleit jurip sha katei ka jaka ban pynthikna ia kane ka jinglong jingman. “Lada la pynthikna, mardor ngin shim ia ki sienjam ha kaba iadei bad ki kam aijingiarap,” ong u heh ka DDMA.

Ki dur lyngba ki video ki pyni ba kane ka par dewiong ka duna ki jaka rung kiba biang kaba pynpaw ruh iaka jingpulom ha kaba iadei bad ki lad jingiada. Ki khubor na kane ka thain ki la kynnoh ba katei ka par dewiong ka dei kaba la pyntreikam beain, kata khlem da don ruh ia ki kyndon na ka bynta ka jingshngain, bad la kynnoh ruh ia ka jingdonkti lang jong ki riew sain pyrthei bad ki bor pulit jong ka thain.

Na ka liang kiba haiing hasem jong kine ki nongtih dewiong kiba jah rngai ki la pynpaw ia ka jingsyier ha kaba uwei na kiba haiing u la ong, “U pyrsa jong nga u dang sahkut hapoh ka krem dewiong. Ngam tip haduh katno ngut kiwei pat kiba la sahkut ha kane ka krem, hynrei nga duwai ban lait na ka jingma.

Kane ka jingjia ka la pynmih ruh ia ka jingsngewkhia kaba jur halor ki kam tih dewiong beain bad ka jingbym don ia ki sienjam kiba shngain hapoh ka thain.

Na ka liang ki bor sorkar ki la ngat ha ka jingshah pynbor na ka bynta ban pynkloi ia ki lad jingiarap khnang ban ioh pyllait im ia kiwei pat ki nongtih par kiba dang jah rngai bad ban shimkhia halor kane ka mat kaba wanrah ia ki jingjia ba sngewsih.