Suba shah pyniap sa kawei ka khynnah skul ha East Jaintia Hills

Syllad | The Rising MeghalayaMarch 14, 2021

Sa kawei ka khynnah skul la suba jur ba kala shah pynïap bad kane kala jia biang ha East Jaiñtia Hills District.

Kane ka jingjia kala jia ia kawei ka khynnah skul kaba pule haka kyrdan klas X, kaba la jah bad khlem wanphai iing ha kawei ka shnong kaba hap hapoh Khliehriat Police Station haka sngi Thohdieng.

Pynban la lap iaka metiap jong ka na Ar kilo ka lynti ban leit sha ka shnong Sutnga kham pajih na surokbah ha khlaw haka sngi Saitjain.

Ia ka metiap jong kane ka khynnah skul la lap haka por kumba 3 baje nohphai sngi da ki katto katne ki khynnah ba thmu leit kheit soh kiba la pyntip pat sha ki rangbah bad kiba haiing hasem jong kane ka khynnah hadien katto katne por.

La iathuh ba la lah ban pynthikna ia kyrteng bad ka jaka sah jong kane ka khynnah lyngba ka pla kot bad ki kot skul bad ka kyrteng skul. Katkum ki dak ki shin haka met kane ka khynnah la lap ba don ki dak mong na ka dur khmat jong ka.

Ki pulit jong ka Khliehriat Police Station kila shimti iaka metiap bad kila ioh ruh iaka mobile phone jong kane ka khynnah.

Haduh bala thoh iaka khubor ka met jong kane ka khynnah ka dang neh ha Ar kilo bad la shai ka sngi yn pyndep ki pulit iaka jingdonkam jong ka aiñ.

Shah pyniap bad suba shah lehbeijot ka khynnah skul ha kawei ka shnong kaba hap ha Ladrymbai OP

Kumban shu pynkynmaw ba ha u bnai Nohprah 2020, kawei ka khynnah skul kaba dang pule klass IX kala shah pyniap bad suba shah lehbeijot ha kawei ka shnong kaba hap Ladrymbai OP. Kane ka khynnah ruh kala jah shuwa shimiet bad haka sngi kaba bud la lap iaka metiap jong ka.