Suba sniew ka KSU ba pyntur ka Assam da ka balang ban shna skul ha khappud Assam Meghalaya
Jowai: Ka Khasi Students’ Union (KSU) kala suba sniew baka sorkar Assam kala pyntur da ka Balang Katholik, ka Jylla Niam Diphu ban shna skul haka shnong Moolaber, ka jaka ba ïakhajia hapdeng ka Assam bad Meghalaya.
Ka jaka kaba la thmu ban tei ïaka skul ka heh 42,000 square feet.
![](https://www.syllad.com/wp-content/uploads/2024/09/JIT-Vacancy-823x1024.avif)
La kynnoh ba kane ka jingtei skul la pyntrei da Diphu Diocese Assam, West Karbi Anglong District ha Moolaber. Ka jingtei kala ïaid shakhmat bad ka KSU marsien ïoh jingtip na ka bor shnong kala hiar sha katei ka thaiñ bad kala lap baka jingpyntrei kala sdang ha kaba la pynïeng ïaki paia. Ka KSU kala kynnoh ba wat ki Pulit na Assam ki ai jingpahara ïaki nongtrei ba trei ïa kane ka skul.
Haka sngi Saitjaiñ ka KSU Laskeiñ Circle hapohka jingialam u President Balawan Suchiang, General Secretary Peter Ram Sutnga, bad u Assistant General Secretary Garland S Manner bad kiwei kiwei ki dkhot marsien ïoh jingtip naki nongshong shnong halor ka jingtei skul ka Balang Katholik na Karbi Anglong ha ka shnong Moolaber, ka jaka ba ïaknieh hapdeng ka Assam bad Meghalaya kila leit jurip dalade bad lap baka jingpyntrei kala ïaid shakhmat.
Ka KSU bad ki nongshong shnong ka ieng haka nongrim ban pyrshah bad kala khanglad ba kin pyntrei ïa katei ka skul bad la kyntu ïaki nongpyniaid Balang Katholik na Assam ba kim dei ban wan pynbiej da ki kam pynroi tang ban ïoh knieh bad kam trai ïaka jaka. Ka KSU kala maham ruh ïaka sorkar Assam ba ka KSU kam ailad ban ïaid ka jingpyntrei ïa kane ka skul.
“Ngim shah ban pyntrei da lei lei ruh ïa kane ka skul namar ba ka Moolaber ka dang don hapdeng ka jing ia khajia pud (dispute area) haduh mynta” la ong ki nongialam ka Seng.
U Waheh Shnong Moolaber u la ïathuh ba la bun bun sien naka liang ka bor shnong kala ïakynduh ïa u Phadar Diphu Diocese ba pyntrei ïa kane ka skul bad pynpaw ka pyrshah jur ïaka jingthmu ka balang ban shna ïa kane ka skul, hynrei kala ïaid beit shakhmat da ka jingïasylla lang ki bor pulit ban ai pahara ïaki nongtrei bylla. La ong ba u Phadar ula bthah ban ai daki jingthoh bad kane ka skul la peit da Jylla Niam Diphu, Assam.
Ka KSU kala pynpaw ka jingpyrshah kaba jur bad kala rai khanglad beit ïaka jingpyntrei ïa kane ka skul bad ki suba sniew ba kane ka jingleh ba ka sorkar Assam tang ban ïoh dakhol jaka kala pyntur da ka balang ban ïoh kyntu pud.
Ka KSU kala dawa mardor naka sorkar MDA ban pynbeit noh kloi ïa u pud u sam jong ka Jylla bad dawa ruh ban pynsangeh ïaka jingpyntrei namar kane kam dei ka kam mission ka dei tang ka jingdakhol jaka.
Leave a Reply