Suba thmu rahbor ïaka nongkhaïi haka jinglute ha Amdoh, shah sumar u runar ha Sylhet

Syllad | The Rising MeghalayaJanuary 8, 2020

DAWKI: Ka jingwan thombor bad lute ki khar Bangladesh ïaka ka ïing ha Amdoh, ka shnong kaba hap ha Rongtilla Border Out Post, kaba jngai 5 KM na Dawki la suba jur ba kadei ka jingthmu ban rahbor ïaka trai ïing kaba dei ka nongkhaïi mawshun bad kwai kaba kham paw ha War Jaiñtia.

Hynrei kane ka jingthmu jong kine ki khar Bangladesh kala pulom noh hadien ba u nongtrei jong kane ka nongkhaïi, Pratap Bareh da ka mynsiem kaba shlur ula ïaleh bad ïakhun ïa kine ki runar na Bangladesh kiba la wan da ka kynhun kumba 10-15 ngut.

Ka khubor kaba la ïohlum ba kane ka nongkhaïi kadei kaba na Nongtalang bad la suba jur ba kine ki runar hadien ba ki la bna ba kane ka nongkhaii ka sah ha Amdoh kila wan ban thombor bad lute lut ïaka jingdon jingem kane ka iing.

Kane ka jingwan thombor ki nong Bangladesh ha kane ka thain kala pynsyier ïaki nongshong shnong ha khappud namar ba kala jia khah khah ha kine ki sngi bad kine ki Khar Bangladesh kila leh bym salia ban kam sha shilliang u pud namar ba la suba jur ba don ba ïalam lynti ïa ki da ki trai shnong.

Ha kane ka jingjia shah thombor bad shah lute katei ka iing jong kane ka nongkhaii ka Long Nonglamin la iathuh ba tang uwei u briew uba tap dur khmat ïalade bad suba jur une u briew u dei uba kane ka longïing ka ithuh i thaw.

Kane ka jingwan thombor ki khar Bangladesh haka shiteng synia jong ka sngi Balang kala jia ha ki ar jaka ha kaba u Pratap Bareh bad ar ngut ki shipai Border Security Force (BSF) kila shah shoh haduh bala mynsaw ha ki runar na Bangaldesh kiba la knieh ruh wat ïaka suloi INSAS Rifles bad ka Suloi SBBL jong ka nongkhaii ha Amdoh.

U Bah Lakador Syiem MPS, Superintendent of Police, West Jaiñtia Hills District, ula ong ba ka kynhun kaba 10-15 ngut kiba na Ri Bangladesh kila wan thombor ïaka ïing kaba sah u Pratap Bareh ha Amdoh kaba don hajan ka Rongtilla Border Out post (BOP) bad rong tuh ka pisa T.35000, mobile phone bad ka suloi SBBL nalor kiwei kiwei kiba don ha ïarong pisa jong u Pratap.

U Pratap ula lait thaw ruh na ka jingshah rahbor ha kine ki runar hadien ba ula lait phet wat hadien ba kila teh la khum ïaka kti jong u.

Kane ka jingjia thombor kine ki Bangladesh ha katei ka ïing kala jia haka por 12 baje shiteng synia.

U Pratap haka jingïaleh ban ïada ïalade bad kiba don ha katei ka ïing ula ïoh siat shisien da ka suloi kaba la knieh noh da ki runar, ong u SP bad ula ong ruh ba u Pratap ula mynsaw hadien ba ula bom shah shoh da ki tiar ba nep ha kitei ki runar.

Ka thymmei khubor, ka ong ba uwei na ki runar ula mynsaw jur na ka jingshah siat haka ktang suloi bala siat u Pratap bad mynta u don hapdeng ka jingsumar ha Sylhet, kaba lah ban ïarap ïaki shipai bad Pulit tohkit halor kane ka jingjia.

Ha kane ka juh ka miet haka por 12:30 Am ki runar na Bangladesh shoh pynmynsaw ïaki arngut ki shipai BSF hajan ka ktem shipai ha Rongtilla BOP bad kila knieh ruh ïaka INSAS Rifles kaba la ioh biang kham pajih na ka jaka ba jia kaba la iehnoh ki runar.

Ïaki ar ngut kiba mynsaw la phah sumar Dawki PHC.

U Deputy Inspector General of Police (Eastern Range) Meghalaya ula hiar sha Dawki bad ka jaka ba shah thombor ki Shipai bad ki paidbah ban pynkhlain ïaka jingpahara. La iadonlang u DC, SP, SDO, SDPO bad BSF. Hadien pat kala don ka ‘flag meeting’ ki shipai BSF bad BGB ban ban iakren ban tem ïa kum kine ki jingjia.