Subroto Mukherjee Cup: Yn mihkhmat ka Khliehriat Presbyterian HSS, Lotus SS na East Jaintia Hills

Syllad | The Rising MeghalayaJune 22, 2024

Ka Khliehriat Presbyterian HSS bad ka Lotus Sec School ki dei ki ar tylli ki skul ki ban ioh ban mihkhmat iaka East Jaintia Hills District shaka State Level Subroto Mukherjee Cup hadien ba kila rah iaka nam lahduh haka final kaba long haka 21 tarik Jylliew haka jingiakhun kaba long ha artificial turf ha Diengshynrum, Khliehriat.

Ia kane ka lympung la pyniaid daka ophis DSO, East Jaintia Hills District.

Kane kala wan hadien ba ka Khliehriat Presbyterian HSS kala pynliem iaka Step By Step SS da 1-0 haka jingiakhun Under-15 Boys’. Ia kane ka shikol la thep da u Arki Langstang (47).

Haba phai sha ka Under-17 Boys’ bad Under-17 Girls’, ha baroh ar tylli kine ki kyrdan la rah iaka nam lahduh da ka Lotus Sec School hadien ba kala lah ban pynliem iaka Dkhiah East SS da 8-0 bad iaka Wapung HSS da 2-0.

Ha lyndet ka namjop kaba 8 kol ka Lotus dei ka jingmih paw ki ar tylli hattrick kaba la thep da ka Saphapaya Lyngdoh (47,10,24) bad ka Risaka Phawa (14,15,19) bad mar shikol na ka Alisha Lyngdoh (26) bad ka Diwakapaya Dkhar (20).

Ki ar kol na ki shynrang pat la thep da u Shemphang Ksih (23) bad Timing Lyngdoh (40).

Ka kongsan kaba iadonlang ha kane ka sngi ka dei ka District School Education Officer ka kong Almo Parisha Syiem, Eugeneson Lyngdoh u nongshah khot kyrpang bad kiwei kiwei.