Syllad ka trok 5 tylli ki kali hap kawei sha riat lait thaw ki mynsiem briew ha Ialong

Syllad | The Rising MeghalayaJuly 11, 2024

Kawei ka trok kaba don ia u Registration number AS01N C 3867 kaba wan thain Phramer kala syllad iaki 5 tylli ki kali kynthup lai tylli ki kali shimet bad artylli ki kali kamai na ka shnong Ialong sha Jowai.

Kane kala jia haka 11 tarik Naitung haka por kumba 3 duna eiei ha surok bah NH-6 hakhmat ka khyrdop Jowai Civil Hospital, Ialong, West Jaintia Hills District.

Ha kane ka jingjia kam shym la don kano kano ka jingjia kaba sngewsih ban duh iaki mynsiem briew lait noh ka jingmynsaw jong ki katto katne ki briew kiba shong hapoh ki artylli ki kali shimet bad la rah iaki hapoh katei ka Hospital.

Shuh shuh ha kane ka jingjia kawei ka kali shimet kaba wan na ka thain Jowai kala sied ryngkat bad ki briew shapoh synrang naka jingshah syllad ha kane ka trok.

Ki artylli ki kali kamai kiba la julor kidei kiba don ia u Registration Number ML-04 C 5811 bad ML 04 D 7503. Katba ki Lai tylli ki kali shimet kiba la julor ki don ia u registration number ML 05 N 2244, ML 04 D 2753 bad ML 04 D 3728.

Haba iadei bad kane ka jingjia, la iohi ba ki pulit ka District ki la wan mar mar ban ai jingiarap ia kiba mynsaw bad ban pyllait ruh na ka jingdheng kali.

Ki nongniah kali kamai ki kynnoh ba u nongniah ka trok dei uba la buaid bad u pynher sted ruh iaka kali.

Kila kyntu iaka sorkar bad NHAI ban buh Speed Breaker haba hiar bad haba kiew shwa ban poi ha Jowai Civil Hospital, Ialong khnang ban lait kano kano ka jingjia iaki briew kiba wan ban shah sumar ha kane ka hospital.