Syllen ka khlaw bad kylla jaka rep synsar ka jaka thung dieng Sal ka JHADC ha Thadmynri

Syllad | The Rising MeghalayaDecember 18, 2020

Ka Jaintia Hills Autonomous District Council (JHADC) kala theh umpjah iaka jingthmu jong ka shnong Namdong A, kaba la ai sngewbha iaka khlaw ban thung dieng bad pynneh pynsah iaka khlaw, pynban kane ka khlaw kala kylla long ka jaka rep synsar haka shnong Thadmynri.

Ka tnad kam khlaw jong ka JHADC ha man la ka mang tyngka kala pynmih jingkhien da ki phew lak ban pynbha iaki jaka thung dieng, sal, kseh, shken bad kiwei kiwei ki jingthung ha Thadmynri, Saitsama bad Khanduli, hynrei ki dak ki shin kila paw baroh ki don tang haka jingthoh, hynrei baroh kine ki khlaw ym shym la ai jingiada ne sumar iaki.

Kaba thamula shuh shuh ba ka khlaw ha Thadmynri kaba ka JHADC kala ioh ei naka Namdong A kala kylla long ka jaka rep synsar bad kane ka jaka mynta kala sdang ban shah thombor ha ki briew kiba naka shnong Thadmynri kiba pom pathar iaki dieng ki siej bad thang dusmon iaka khlaw.

Kane ka jaka ka don ha u pudsawdong na North- Wah Mynkhen, East – Luti Khangkhra, South Lum Mynksiang Lum Lyndaw bad n aka West-Lum thnad forest District Council.

Katkum ki kot ki sla kala don ka jingiakut (agreement) hadpeng ka JHADC bad ka Namdong naduh u snem 1980 haka 5 tarik Naitung (July) bala aiti ia kane ka khlaw ban pynbha bad sumar ia kane ka khlaw da ka JHADC. Ban thung iaki dieng Sal bad kiwei kiwei jait dieng.

Ka Dorbar Shnong Namdong A hadien ba kala iohi iaka jingleh bymsuidniew ka JHADC bad ka tnad kam khlaw ka konsil ban iada ia kane ka khlaw kala ujor la bunsien, kata ha u snem 2007, 2015 bad 2017

Ha u snem 2007 ka Dorbar Shnong Namdong ryngkat bad ka ophis kam khlaw ka JHADC kila lap ia ka jingpom tuh ia ki dieng sal na kane ka khlaw bad la ioh ban kurup ia kine ki dieng, hynrei ha ki snem kiba hadien naduh 2014 ter ter hapoh ka jingialam u ma Thombor Shiwat kum u CEM wat la ka bor shnong kala buh jingujor sha ka ophis jong ka JHADC, hynrei ym don kino kino ki dak ki shin ba ka EC kaba ialam u Thombor ne ka tnad kam khlaw kin shimkhia ban sumar ia kane ka khlaw.

“Kane ka jingbym shimkhia ka JHADC kala theh umpjah iaka jingthmu jong ka shnong ban aiti haka konsil ban iada iaka khlaw bad ka sawdong sawkun jong ka. Lada ka konsil ka sumar sukher ia kane ka khlaw kaba heh 394.27 hectare, tang na kane ka khlaw kan kamai bad ioh nong da ki klur,” la ong u nongialam ka Raij Namdong u ma Elias Susngi ba bynrap ba mynta kane ka khlaw kala julor bad kala kylla ka jaka rep synsar ki briew naka shnong Thadmynri.

“Ka JHADC haduh mynta kam shym la leh eiei bad ka bor shnong ruh kam shym la ioh jubab eiei wat hadien bun tylli ki jingujor kiba ngi la buh, bad lada ka JHADC ka kuman bad leh bym suidniew iaka jingiakut ngin tynrong halade iaka jingkitkhlieh ban khang iaki briew ban rep ha kane ka khlaw bad ban sdang biang ban pynheh pynsan ia ki dieng ki siej lyngba ka bor shnong Namdong,” la ong u Elias.