Synjor bad jot pra ka hostel ka skul Govt. Girls HSS Jowai

Syllad | The Rising MeghalayaSeptember 6, 2019

JOWAI: Ka hostel jong ki khynnah skul ka Government Girls’ Higher Secondary School kala jot rathai bad ki biar kila orpait lut ha kaba ki bor pyniaid kim nud shuh ban shah iaki khynnah ban sah ha kane ka ïing namar ba kala synjor shaba palat bad ka don haka jingma.

Ki khynnah skul kiba wan na ki shnong kiba jngai kiba thmu ban sah haka hostel kim ioh shuh ban sah ha katei ka iing naduh ba sdang une u snem namar ba kane ka iing kala jot bad la paw ki nar rod bad ka donkam ban shna thymmai.

Ka Ri Jaintia Youth Federation (RJYF) hadien ba kila ïoh jingujor na ki kmie ki kpa jong ki khynnah kala leit ban jurip ïa kane jaka sah jong ki khynnah kynthei, ha kaba la lap shisha ba kane ka building jong ka Hostel ka la jot rathai bad ka don hapdeng ka jingma.

U Ebormi Pale General Secretary RJYF, u Molith Laloo Vice President RJYF bad kiwei kiwei ki dkhot kane ka seng kila iakynduh iaka Guardian jong kane ka Hostel ka kong Banrilin Chyna,.

Ka kong Banri kaba peit ia kane ka hostel kala ïathuh ba naduh ba sdang jong une snem kim shah shuh iaki khynnah ban sah ha katei ka ïing namar ba kala shong synjor shaba palat bad ki tieng ruh ioh jia eiei iaki khynnah bad kim nud shuh ban kitkhlieh ban shah iaki khynnah ban sah ha kane ka hostel.

Na kaliang kiba halor kila dep pyntip sha PWD bad sha ka tnad Pule Puthi, hynrei haduh mynta ym don mano mano ba shimkhia ban shna ne maramot kane ka ïing sah ki khynnah skul.

Na kaliang ki nongalam ka RJYF kala dawa naka tnad Pule Puthi ban shna ïa katei ka hostel ban myntoi ki khynnah kiba wan na ki jaka ba jngai bad nongkyndong ban bteng iaka jingpule jong ki ha Jowai bad ban kin lait ruh ban sah iing wai.