Synjor ka ïing la khang iaka hostel ki khynnah skul Govt Girls’ Jowai: KSU

Syllad | The Rising MeghalayaMarch 1, 2024

Ka Khasi Student Union (KSU) Jowai Circle haka jingialam u Morning Pasi Vice President Nidapoi Shadap General Secretary haka 29 tarik Rymphang ki la leit ban jurip iaka Govt. Girls’ Hostel kaba don ha Mynthong, Jowai.

Haka jingleit jurip ka KSU ka lap ba kane ka Hostel kam long shuh kaba shngain iaki khynnah ban sah namar ka long kaba la jot rathai bad ki kynroh ki ruh ki la sdang orpait bad buh jingma iaki khynnah.

Hadien ka jingjurip, ka KSU Jowai Circle ka la iakynduh bad ka Principal jong ka Govt Girls Higher Secondary School kaba la iathuh ba na ka liang ki bor pyniaid jong ka skul ki la dep ban buh da ki jingthoh sha ki bor ba dei khmih bad ki bor ba dei khmih ki la wan jurip mynshem snem.

Shuh shuh ka la pyntip ruh ba katei ka Hostel ka ngiam haduh 80 ngut ki khynnah skul hynrei namar ka jingjot rathai la hap ban khang noh iaka naduh u snem 2018.

Na kaliang ka KSU kala kyntu iaka tnad pule puthi ka sorkar ban tei thymmai iaka hostel, khnang ba ki khynnah skul kiba wan na ki shnong kaba jngai kin ioh myntoi.