Synjor ka jingkieng, ym treikam ka jingkhang khlong maw khlong shyiap ha Myntdu iakynduh DC ka Synjuk Waheh Chnong Jowai

Syllad | The Rising MeghalayaNovember 18, 2021

Ka Synjuk Waheh Chnong Jowai haka sngi Palei kala leit ïakynduh ïa u Deputy Commissioner, West Jaiñtia Hills District, Garod LSN Dykes, IAS na bynta ban ïakren halor ka jingbymtreikam ka jingkhang khlong maw khlong shyiap bad ka jingtheh khyndew ha Wah Myntdu wat hadien ba ula pynjari da ka kyndon aiñ 144 CrPC.

Ha kane ka jingïakynduh la ïalam da u President ka synjuk u Ma Alan Niangti haka jingiadonlang u General Secretary U Ma Riquoma Rq Laloo bad u Ma DH Pde Tresurer ka Synjuk.

Na ka liang u DC ula kyntu ïaka synjuk ban peitngor bad ban shondur ïa kino kino kiba leh pyrshah bad na ka liang jong u khnang ban ioh leh ia kaba donkam. Ka synjuk kala dawa na u DC ba dei ban pynshitom ia kiba leh pyrshah khnang ban lah ban iada iaka jingjaboh ka wah Myntdu.

Haba ïadei bad ka jingkieng foot over bridge ne ka jingkieng kaba iaid tang ki nongiaid lynti kaba pynïasoh ïaka skul Mazzerello bad Marianhill kaba shong synjor na ka jingsarang, synjuk kala kyrpad ia u DC ban pynduh noh ïa katei ka jingkieng.

Na kaliang u DC ula ïathuh ba ula ïaleh ban wad ki lad ki lynti hynrei namar ba kadei ka lynti iaid kaba kongsan haka leit ka wan un sa peit kumno ban leh khnang ban pynkloi ïaka kam. Nalor ka Synjuk ka dawa ruh ban maramot iaka light ha khmat ka DC ophis, khnang ban shai haka por mynmiet.

Shuh shuh ka synjuk kala ai khublei ia u DCba iatreilang bad ka synjuk ha kino kino ki kam bad ka ai khublei ruh ia ka Jowai Municipal Board bad u MLA Jowai ma Wailadmiki kiba shimkhia ban pynioh iaki borti ban bret iaki ñiut ba pyut bad ki bym pyut kiba la sam ha kylleng ki shnong ha sor Jowai. Ka synjuk kala khot ka jingiatreilang u paidbah ban wanrah iaka khuid ka suba.