Synñiang Jaintia Hills Development Society da u khaw sha ki longïing ba duk ha Mooshrot & Sahsniang

Syllad | The Rising MeghalayaApril 10, 2020

Ka Jaintia Hills Development Society (JHDS) kaba dei ka Social Wing jong ka Jyllaniam Jowai mynta ka Sngi U Blei kala bteng biang sa shisien pat ïa ki kam leh isynei da kaba ai jingiarap sha ki longïing ba duk jong ki ar tylli ki shnong ha Mooshrot bad Sahsniang kiba don ha West Jaiñtia Hills District.

Ka JHDS kala sam da u khaw bad u dai sha ki 45 tylli ki longïing baduk jong ka Shnong Mooshrot kynthup ia 4 tylli ki Longïing ha Shnong Sahsniang.

Ha kane ka jingsam marbam ka JHDS la iadonlang u Director ka Jaintia Hills Development Society (JHDS) u Fr. Manbha Pakem ha ryngkat ka jingiadonlang u President ka Catholic Association u Ma Gilbert Sten, U Vice President ka Synjuk Ki Seng Rangbah u Ma. Micheal Sayoo, U President ka Indian Catholic Youth Movement (ICYM) u Ma Mutshwa Thabah bad u Coordinator ka JHDS u Ma Denis Kurkalang.

Haba ai jingkren u Fr. Manbha Pakem u la pynbna ba ym tang ia ki longïing baduk jong kine ki artylli ki Shnong yn ai jingiarap, hynrei ka JHDS ka la mang ruh ban ai Jingiarap sa 227 tylli ki long-ing baduk jong ki 12 tylli ki Shnong ka ban sdang biang naduh lashai ka sngi.

Shuh shuh u la bynrap ruh ba ka JHDS ka don ka jingkitkhlieh ha ka ban ia bynta lang ia ki jingeh ba ki briew ki iakynduh ha kum kane ka por. Ha ka juh ka por u la kyntu ia ki paidbah ba ki dei ia kyrshan lem markylliang khamtam ia ki duk ki rangli bad ban da bud ryntih ia ki jingbthah ka Sorkar khnang ban iada na ka jing saphriang une u khñiang jingpang.

Ha shwa ban sam ia kine ki jingbam, la ioh ruh ia ki jingkren lyngkot na u Ma Gilbert Sten, na u Ma Micheal Sayoo bad na u Ma Mutshwa Thabah kiba la batai lyngkot ia ki katto katne ki lad jingiada ban lait na ka jingsaphriang jong kane ka jingpang ba shyrkhei.

U Rangbah Shnong ka Shnong Mooshrot u Ma Janai Suchiang u la ai ka jingkhublei kyrpang ki Team jong ka Jaintia Hills Development Society hapoh ka jingialam jong u Director kiba la pyni shisha ba ki don ka jingkitkhlieh na ka bynta ki duk ki rangli bad u la kyntu ruh ia ki paidbah ba kin nym duh jingkyrmen ha kum kane ka por pynban ki dei ban iasnohktilang bad ka Sorkar khnang ba ka Jylla baroh ka wei kan lait na ka jingshah ktah haka khlam coronavirus.