Synniang jingiarap pisa ka kynhun WhatsApp “SUPH” sha ki CQC ha Nongbah Jowai
Bun na ngi ngi pyndonkam ia ka Whatsapp na bynta ban phah message ne phah dur phah video shi bahaiing ba hasem ne shi paralok parajok ne para ba iatreilang bad kumta ter ter, hynrei ha kane ka kynti mynta lyngba ka kynhun Whatsapp mih pyrthei kawei ka sengbhalang ban ai jingiarap ia ki paidbah ban iakhun pyrshah ia u khniang jingpang Corona Virus ne u COVID-19 bad ki jingeh kiba mih na ka daw jong ka jingpynjari ia ka National Lockdown.
Ia kane ka kynhun Whatsapp la suit la shor da u Chief Executive Member barim jong ka Khasi Hills Autonomous District Council (KHADC) bad u Minister ka tnat Foods & Civil Supplies barim u Bah Hispreachering Son Shylla ha ka 3 tarik u bnai Jymmang, 2020. La ai kyrteng ia kane ka Whatsapp Group kum ka Sur U Paidbah Hynniewtrep ne ka SUPH.
La seng ia SUPH ne ka Sur U Paidbah Hynniewtrep da ka jingthmu ban pynsngew sha ka Sorkar halor ka jingeh jong ki paidbah ba ki iakynduh hadien ka jingpynjari ia ka National Lockdown pyrshah ia ka jingpang COVID-19 bad kumjuh ban pyni sha ka Sorkar halor ki jingbym biang halor ka jingpynkhreh jong ka Sorkar pyrshah ia kane ka jingpang Khlam kaba jur.
Hadien ba ka Sorkar ka la rai ban ai lad noh ia ka samla pule ne ki nongshong shnong jong ka jylla ban wanphai iing noh, ka la mih syndet ka jingpynaw na ka liang jong ka Sorkar ba kam lah satia ban pynsah ia baroh ki nongshong shnong jong ka kiba wanphai iing ha ki Quarantine Centre kiba la pynkhreh da ka Sorkar.
Dei ha kane ka kynti ba ki Dorbar Shnong bapher bapher kiba saphriang ha Ri Lum Khasi Jaintia ki la mih shakhmat ban shimti dalade ban pynkhreh ia ki Community Quarantine Centre ha man la ki shnong ki thaw na bynta ban ai jaka sah shipor ia ki nongshong shnong kiba wanphai na shabar ka jylla.
Ka khubor jong ka seng ia ki Community Quarantine Centre ne ki CQC da ki Dorbar Shnong ka la poi sha ki dkhot jong ka Sur u Paidbah Hynniewtrep bad ha ka jingprat lynti jong u Bah Shylla, ki Dkhot jong katei ka Kynhun Whatsapp ki la rai ban ia noh synniang katba lah isynei ban ai jingiarap sha kine ki CQC.
Ha ka Sngi Saitjain kaba lah, u dkhot jong ka SUPH bad uba long ruh u Waheh Chnong U Bah Pyrkhat Shylla u la leit hiar sha ka Shnong Ialong kaba don ha West Jaintia Hills District ban leit ai ia ka pisa ai jingiarap kaba 5000 hajar tyngka na ka liang ka SUPH sha ka Dorbar Shnong Ialong kaba pyniaid artylli ki CQC.
La pdiang ia katei jingai jingiarap da u Bah Bishar Shylla uba long u Waheh Chnong jong ka Shnong Ialong. Ha kitei ki artylli ki CQC don 13 ngut ki samla pule kynthei bad 10 ngut ki samla pule shynrang kiba wanphai iing na shabar jylla.
Haka Sngi Nyngkong, u Bah Pyrkhat ula ai ia song ai jingiarap sha ka Dorbar Shnong Ladthadlaboh kaba Hynniew Hajar Tyngka kaba pyniaid ia ki saw tylli ki CQC ha ka jingiatreilang bad ka Dorbar Shnong Mookyrdup, Dorbar Shnong Tyndong Wapung bad kiwei de. La pdiang ia katei ka jingai jingiarap da u Bah L D Lakiang uba long u Waheh Chnong jong ka Shnong Ladthadlaboh.
U Bah Pyrkhat u la iathuh ba ia kitei jingai jingiarap pisa sha ki CQC la synniang da ki dkhot jong ka SUPH kaba don kumba 200 ngut ki dkhot khnang iarap ia ki Dorbar Shnong kiba shim ia ka lyngkor kaba khia ban pynbit pynbiang ia kine ki CQC.
Facebook
Instagram
Youtube
Twitter
Leave a Reply