Synñiang ka Kong Grace da ki kor pynsawa bad solar light haka shnong Nongskhen

Syllad | The Rising MeghalayaNovember 14, 2020

Ka Kong Grace M Kharpuri ka MDC ka thain Nongskhen kala synñiang 14 tylli ki Solar Street Light bad ki Public Address System (kor pynsawa) sha ka shnong Nongskhen haka sngi Thohdieng.

Ïa kine ki tiar aiti haka jingïalang kaba la ïadonlang ki dkhot ka executive committee ka Dorbar Shnong, ki riew rangbah, ki nongkyrshan kane ka nongmihkhmat, ki nongïalam shnong barim bad ba mynta kumjuh ki longkmie longkpa.

Watla ka MDC kam lah ban ïadon bynta lang haka jingïalang na kidaw ki bym lah kiar, hynrei ka dorbar shnong kala pyrto ïaki kam jong ka ban ïarap iaka shnong ka thaw.

“Kum ka dorbar shnong ngi ai khublei ïaka Kong Grace M Kharpuri ym dei eh tang na ka bynta kine ki tiar, hynrei ïa ka jinglong la kloi jong ka na ka por sha ka por ban ai ka jingïatreilang bad ka shnong ha bun ki liang”, la ong u Bah T Marbaniang Rangbah Shnong.

Ula ïathuh ba ka shnong ka la ïoh bynta ïaki jingïarap na ka skhim MDC jong ka khamtam ha ka por ka lockdown kaba ka synñiang daki mar bam shaki longïing ba duk bad ka la wan jngoh bad ïarap ïaka shnong na ka bynta ka jingpynlut ban pynshong quarantine ïaki samla ka shnong kiba wanphai na shabar Jylla ha ka por ka jingïaleh pyrshah ïaka khlam, ula ong.

Baroh ki nongkren kila ai khublei kaba kyrpang eh ïaka MDC na ka bynta ka jingkloi bad kylluid mynsiem jong ka ban aiti ïa kitei ki jingdonkam kiba ka shnong hi ka la kyrpad ban ïoh jingïarap bad kane ka pyni ba ki kam jong ka ki kam kren kham jam ban ïaka ktien.

Ka Dorbar Shnong ka la ai khublei kitbok kitrwiang ïaka MDC ba kan ïai don borabor ha ka met kaba khlaiñ ba shait ban nangïai kyntiew ïaka imlang sahlang.