Synñiang ka KSU da u khaw sha kiba duna dkhot met haka jingdap 10 snem ka tnad ha Barato

Syllad | The Rising MeghalayaOctober 12, 2020

Ka Khasi Students’ Union (KSU) Barato Unit haka sngi Saitjain kala synñiang da u khaw haka jingdap 10 snem ka jingiaid lynti jong ka sha ki briew ba duna dkhot met.

Ha kane ka jingrakhe iaka jingdap 10 snem katei ka Unit, ki nongialam ka KSU Barato Unit ha ryngkat ka jingiadon lang u Waheh Shnong ka Shnong Barato, U MDC katei ka thaiñ Aibor Shadap, u Hamar Muskut president KSU Nartiang Circle, Chanbor War GS KSU Nartiang Circle, u SS Niangti CEC Member, u Wallam Nongsiej President KSU Delhi Unit, u Rueben Najiar Incharge Jaintia Hills bad kiwei kiwei kila iadonlang.

Haka juh hi ka sngi la pynshkem ruh iaki nongkitkam ba thymmai kane ka Unit naka bynta ka samoi treikam 2020-2023. Ia kane ka unit la pynshkem da u Rapborlang Paliar Vice President ka KSU Sengkmie.

Ki dkhot ba thymmai ka KSU Barato Unit ki kynthup ia u Ehboklang Sten President, Titos Shadap Vice President, Ready Shadap General Secretary, Pynshongdor Sten Assistant General Secretary, Pynkyrhai Sten Organising Secretary, C. Tyngkan Sports Secretary, Nihun Sten Finance Secretary, Education Secretary Marki Pala, Thrangmynsien Tmung Publicity Secretary, PA System Incharge Neveruse Tyngkan, Consciency Tmung kum u Advider bad kumba 14 ngut ki dkhot.

Ha kawei pat ka khubor, ka KSU Barato Unit ka la maham jur iaki briew kiba pyniap iaki dohum ha Wah Mynriang da kaba thang bom ha katei ka wah, pynap jar, ber dawai bad kiwei kiwei kiba ktah iaki dohum dopnat bad ka koit ka khiah ki briew.

“Ngim pyrshah iaka jingwan khwai jong ki, hynrei ngi pyrshah lada pyndonkam da u bom, ber dawai bad pynap jar sha katei ka Wah” la ong u Samla Ehboklang Sten President Katei ka Unit

Ka KSU kala maham jur iaki riewsniew kiba mlien ban pynjot ia katei ka Wah naduh na ka jaka ba ki khot Iashem Um haduh ha Thwai Syrngan ba lada lap naka liang ka KSU ha ryngkat ka Dorbar Shnong yn pynshitom katkum ka ain.