Synniang ka VO da ka iing iaka dkhot haka shnong Pammanik

Syllad | The Rising MeghalayaMarch 30, 2025

Ka Pynbha VO jong ka Shnong Pammanik kaba hap ha Laskein Block haka 29 tarik Lber kala plie iaka iing jong ka Kong Iowanka Pakma kaba dei ka dkhot SHGs jong ka Iahluti SHG.

Ka Kong Iowanka Pakma kaba don 2 ngut ki khun ka sah haka iing trep bad shem jingeh khamtam haka por slap. Ka VO hadien ba kala iohi iaka jingeh jong ka Kong Pakma ka la shim iaka sienjam ban iarap ia kane ka long iing.

Ia kane ka iing la shna daka jinglut jingsep na ka VO ryngkat ka jingnoh synniang ki katto katne ki riew rangbah kaba kot ym duna iaka T. 105200/.

Lah ban kdew ba kane ka dei ka sien kaba ar ba ka Pynbha VO kala iarap bad pynshna iing ia ki longiing ba duk. Ka Pynbha VO ka don haduh 44 tylli ki SHGs kiba thaw da ka Meghalaya State Rural Livelihood Society (MSRLS, BMMU Laskein Block).

Shwa ka jingaiti iaka iing, kala don ka jingialang ba la pyniaid da ka Kong Facility Dhar President VO bad la ioh ka jingduwai naka Kong Justmin Amanda Talang kumjuh ka jingkren pdiang na ka Kong Shiioni Talang na ka ling ka VO.

La ioh ka jingkren lyngkot na u Ma Teibor Talang uba dei u nonghikai, ka Kong Nehipaia Talang, Ma CFS Khonglah na ophis BMMU Laskein bad ka Kong Iowanka Pakma kum ka nongpdiang ia kane ka iing.

U kongsan Ma M Suchiang Gram Sevak Laskein C&RD Block ula iaroh ia ka Pynbha VO na ka bynta ka jingtrei shitom jong ka ban iarap ia kane ka long iing kaba don hadpeng ka jingduk bad ki kitbok kit rwiang ruh ban nang trei shitom shuh shuh na bynta ki kam ba bha hapoh ka imlang sahlang.

La ioh ruh ki jingshad jingrwai b aa shim bynta da ki SHGs, ka Balang CNI, ki samla ka shnong nalor kiwei bad iaka jingialang la pynwai da ki kyntien khublei na ka Kong M. Talang EC member jong ka VO.