Synñiang marbam ka KNTD&OA sha ki briew ba don jingduna ha ki 11 shnong

Syllad | The Rising MeghalayaAugust 21, 2020

Ka Ksehrynshang Namdong Tourist Driver & Owner Association (KNTD&OA) kaba la seng ha u snem 2015 kaba don ïaka kyrteng im sngi ‘Kamai dei hok” da ka jingsngewkhia mynsiem ka la synñiang jingïarap shaki briew kiba duna dkhot met kiba don haki 11 tylli Shnong bapher bapher ba hap hapoh ka Mynsngat-Khanduli Constituency.

Ka Ksehrynshang Namdong Tourist Driver & Owner Association (KNTD&OA) ka la ïarap bad ai sngewbha da u khaw bad u dai sha ki 75 ngut ki nongshong shnong kynthei bad shynrang jong ki 11 tylli ki shnong ba kynthup ka shnong Ksehrynshang, Moobakhon, Nongmulieh, Sehlama, Namdong B, Namdong A, Umjalasiaw, Thadmukoh, Khonsaro bad Ladmynngor.

Ïa u khaw bad u dai la leit ban aiti mynta ka sngi Thohdieng bad la pyndep shwa ïaka jingsam paidbah haki artylli ki shnong ka shnong Ksehrynshang bad Namdong B.

Hashwa ban sam ïa u khaw ka la don ka jingïalang lyngkot ba la pyniaid da u Waheh Shnong ka Ksehrynshang u Bah Malvi Timung bad u Waheh Shnong ka Namdong-B u Bah Andrias Sumer haka jingïadonlang u President ka All Jaintia Tourist & Commercial Vehicle Association u Bah Paila Lyngkot, u Secretary ka Ksehrynshang Namdong Tourist Driver & Owner Association u Bah Phinroi Surong bad ki dkhot nongkitkam jong ka seng.

U Bah Hopingwell Phawa uba long u President ka Ksehrynshang Namdong Tourist Driver & Owner Association haka jingkren ula pynpaw ka jingkmen ba ka seng ka la ïoh ka lad ban ïarap ïa kiba donkam shisha ka jingïarap bad u ngeit skhem ba kane ka jingïarap barit jong ka seng kan long ka jingkyrkhu ïaki baroh kito kiba ïoh pdiang.

Na ka liang ki Waheh Shnong jong ki 11 tylli ki shnong haka jingkren, kila pynpaw ka jingsngewnguh kaba khraw ïaka seng ki nongñiah kali namar ka jingkylluid mynsiem jong ki ban ïarap ïa kum kine ki briew kiba donkam shisha ka jingïarap bad ki bym lah ban trei ban ktah naka daw ka jingduna haki dkhot met ha kajuh ka por ki la ai ka jingïaroh ïaka seng kaba la kynmaw bad phaikhmat sha kine ki nongshong shnong.

Kine ki rangbah ki la ai mynsiem bad ai ki kyntien kyrkhu kyrdoh ïaki nongialam bad dkhot ka seng ba kin ïoh ka met kaba koit bakhlaiñ haki sngi ki por ba dang wan bad ruh U Blei un kyrkhu kyrdoh ïaki kam ki jam kiba ki trei.