Synniang pisa ka Raij Raliang sha ka CMRF

Syllad | The Rising MeghalayaMay 25, 2020

Ka Raij Raliang, Elaka Raliang mynta ka sngi kala synniang jingiarap pisa sha ka Chief Minister’s Relief Fund (CMRF) kum shibynta ban kyrshan lem iaka sorkar haka jingiakhun iaka khlam COVID-19.

Ia kane ka pisa kaba la kot T.50 hajar la leit ban aiti haka jingialam khmat u Dolloi ka Elaka Raliang ma Chawas Lyngdoh haka jingiadonlang nongialam ka Raij Raliang kiba tip kum ki 7 Waheh ka Raij Raliang kiba kynthup ia u Pator bad Lyngdoh ka Raij, dkhot ka executive committee jong ka Raij Raliang ha kamra treikam u DC West Jaiñtia Hills ma Garod LSN Dykes.

U Dolloi ula ong ba kane ka jingai jong ka Raij Raliang kalong kaba rit, hynrei ki ngeit skhem ba ka sorkar kan ioh ka jingiarap lyngba kane ka jingai ka jong ki ban ioh pynbiang iaki jingdonkam ha kaban iakhun pyrshah iaka khlam COVID-19.

U Dolloi ka Elaka Raliang ula pynpaw ka jingsngewnguh kaba khraw iaka sorkar bad ki briew kiba mih hakhmat eh ban iakhun iaka khlam COVID naduh ki doktor, nurse, pulit, ki volunteer, ki waheh shnong kiba bapher bapher bad kiwei kiwei kiba trei borbah ban ïakhun ban tem ïaka khlam hala ki jong ki jong ki bor bad ka rukom trei.