Synniang u Ma Wailadmiki Shylla T.2 lak sha ka Dorbar Shnong Tympang Iawmusiang

Syllad | The Rising MeghalayaJune 27, 2020

U MLA jong ka Jowai u ma Wailadmiki Shylla ula synniang T.2lak sha ka Dorbar Shnong jong ka Tympang Iawmusiang Jowai.

Ia kane ka pisa ula aiti ha u Waheh Shnong Edystone Shylla haka sngi Saitjain ha ka jingialang ban plie iaka ophis ba pura jong ka dorbar shnong Tympang Iawmusiang, Jowai.

U MLA haba kren iaroh ia u waheh shnong ka Tympang bad ki dkhot shnong kiba la shimkhia ban shna iaka ophis shnong bad ban buh iaki IEC ne ki tynghung shnong kaba dei kawei na ki lad ban ai jingtip sha u paidbah ha kum kane ka por ba bun ki jingpynbna sorkar kaba ki paidbah ki donkam ban tip.

Ula iaroh iaki nongialam shnong kiba la snohktilang bad ka bor district ban iakhun iaka khlam COVID-19.

“Nga sngewsarong ba ka district jong ngi kala lait na ka jingiabit khlam bad kane ka jia long namar ka jingiatreilang jong ki shnong bad ki paidbah salonsar. Nga ai khublei ruh ia kiba mih shakhmat ban trei naduh ki pulit ki nurse bad kiwei kiba trei borbah ban tem iaka jingiakhun pyrshah iaka khlam COVID-19,” ong u ma Wailadmiki Shylla.

U Waheh Shnong ma Edystone Shylla haba kren ula iathuh ba kim shym la khot ia baroh ki dkhot shnong ha kane ka prokram namar ka jinghap ban bud iaki kyndon ba la bthah ka sorkar. Ula ai khublei ia u MLA uba synniang iaka pisa T.2lak sha ka shnong bad u kyrmen ha ki sngi ban wan ruh u MLA un sa theh shuh shuh kiwei kiwei ki jingiarap na ka bynta ka roi ka par ka Iawmusiang kaba dei ka iitkhmih ka Jowai.

Ula iathuh ruh ba ka Dorbar Shnong Tympang Iawmusiang kala lah ban ia pynbeit ia u pud u sam ka shnong bad ka Dorbar Shnong Mynthong bad kane kan iarap shibun iaki ar shnong ban peit bad ban synshar hala u jong u pud u sam.

Ka dorbar shnong Tympang Iawmusiang kala ai iaka dorkhat sha u MLA da u bad ka jingai khublei la ai da u AK Lywait Secretary Shnong.

La wan ban sakhi ha kane ka jingialang plie iaka ophis shnong ka Tympang Iawmusiang da u president bad secretary synjuk waheh shnong Jowai u ma Alan Niangti bad u LD Lakiang nalor kloi dkhot shnong ba kynthup iaki longkmie longkpa.