Synñiang u MLA North Shillong da ki kor computer sha ka Seng Khasi College

Syllad | The Rising MeghalayaMarch 3, 2022

U MLA ka 17 North Shillong Constituency, u bah Adelbert Nongrum haka sngi Palei ula synñiang da ki kor computer sha ka Seng Khasi College, Jaiaw, Shillong.

Ia kine ki computer u Adelbert ula aiti haka jingialang kaba long ha hall jong ka kolej haka jingiadonlang u Secretary ka kolej u bah Richard H. Dkhar, u Principal bah Wandur Basan Rynjah lem bad ki nonghikai bad ki nongtrei jong kane ka kolej.

Haba kren kum u kongsan ha kane ka jingialang, u bah Adelbert u sngew ban ai khublei ia u Principal, ki dkhot jong ka Governing Body, ia ki nonghikai, kiba aiti met bad mynsiem ha ka jingshakri ka jong ki ban thaw dur, pynwandur bad ban sain dur naka bynta ka lawei kaba phyrnai  ki khun ki kti kiban dang wan.

U Bah Adelbert u ai khublei kyrpang ia baroh, halor ka jingai mynsiem ia u kum u nongmihkhmat, uba la pyrshang ialade ban long ym tang kum uta u nong mihkhmat, hynrei ban long ruh kum u nongialam.

U bah Adelbert u iathuh ba ha ka jingshisha ka skhim naka bynta kane ka kam kam pat shym la wan, pynban ki paralok ba iajan ki jong u, ki la nang ai ia ki tiar, ha kaba kam shym la kut tang hangne hynrei ha baroh kibynta jong ka constituency kaba hap hapoh ka jong u.

Nalor katta u bah Adelbert u pynpaw ba ka jingwan lyngshop ka khlam jingpang Covid-19 ka la ktah bha ia ka ri bad ia ka pyrthei hi baroh kawei, katno tam lei lei ha ka liang ka pule ka puthi, hynrei ka jingmih paw ka juk online, kaba lalong ka jingkyrkhu naka bynta ki khynnah pule, ia ki nonghikai, kiba la aiti met bad mynsiem wat hapdeng kiba bun ki jingeh kaba na kawei sha ka wei pat ka sorkar kim shym la khein briew ia ka kamram ka jong ki ban pynbiang pynbit ia ka jingdonkam.

Ia ka kyntien pdiang sngewbha la ai da u Principal ka kolej u bah  Wandur Basan Rynjah, la ioh ruh ia ka jingkren na Secretary ka kolej u Rgh Richard H Dkhar bad ia ki kyntien ai khublei la ioh na kong Syrpailin Wanning bad ia ka jingialang baroh kawei la pyniaid da u bah Malcolm Lyngdoh.