Synreit dawai pyniap khniang ha iew Iawmusiang

Syllad | The Rising MeghalayaJuly 31, 2020

Ka Dorbar Shnong Tympang Iawmusiang mynta ka sngi kala synreit dawai pyniap khniang ha ki basa iew, ki dukan bad ki lynti paidbah ban rung shapoh iew ha Iawmusiang ban iakhun pyrshah bad ban pyndkut ia u kynjri jong u khniang coronavirus.

Kane ka jingsynreit iaki dawai pyniap khniang la pynlong ha baroh ki basa shong die, ki dukan kiba don hapoh ka iew Iawmusiang.

Ka Dorbar Shnong Tympang Iawmusiang kan pynlong ia kane ka jingsynreit dawai sa lashai ka sngi.

U waheh shnong Tympang Iawmusiang, Ma Edystone Shylla ula ong ruh ba naduh lashai ka sngi kila khang ruh ban pyndonkam iaki plastik bunrong ban iakhun ban jop iaka jaboh plastik kaba la ktah iaki sawdong sawkun ka mariang khamtam iaka wah Myntdu ka wah kaba pynbiang umbam umdih iaka shnong Jowai.

Ka Dorbar shnong Tympang Iawmusiang kala khot ka jingiatreilang jong ki paidbah ki nongshong iew, ki nongdie dukan ha kaba iadei ban pynduh pyndam iaka plastik bad ban wanrah iaka khuid suba ka shnong ka thaw.