Synreit dawai pyniap khniang ka HYC Shella ha ki jaka paidbah bad jaka sumar

Syllad | The Rising MeghalayaMay 26, 2021

Ka HYC Shella Area Unit haka sngi ba Ar haka jingialam u president Aibok Swett, general secretary Seiborlang Diengdoh, vice president Batyngshain Natep ha ryngkat ki dkhot jong ka kum shi bynta ban ia snohkti lang ha ka jingiakhun pyrshah ia kane ka khlam Covid-19, mynta ka sngi ka 25 tarik u bnai Jymmang, kala pynlong iaka jingsynreit dawai hapoh Shnong Shella bad ki Shnong ba marjan.

La sdang iaka jingsynreit dawai na Kher Sohlap-Umdoh-Mawpot kaba dei ka jaka ba pynlong ia ka Hat Shella ha kaba lah ioh ban synreit dawai ia ki dukan, ki lynti syngkieng bad ki sawdong sawkun jong ki ing ki sem kiba don hapoh ka jaka long iew. La synreit dawai ruh ha Kher Pyrkan, Disong, Duba, Jamew, Jasir bad Mawryngkhong.

Kyrpang la pynlut por ruh ban synreit dawai ia ka Shella PHC bad Sohlap Sub-Centre kiba dei ki jaka ai jingsumar ia ki paidbah jong ka dong ka thain khamtam ha kum kane ka por.

Nalor kitei ki jaka la leit synreit dawai ia ki dukan bad ki lynti iaid ha ryngkat ki sawdong sawkun jong ka jaka iadie iathied ki paramarjan Shnong kaba don ha Jatap, Elaka Mustoh.

Ka HYC ka kyntu ia baroh ban long kiba phikir bad sumar bha ialade da kaba bud ryntih ia ki kyndon bad ki jingbthah jong ka Sorkar kum ban tap ia ki Mask, ban nym ia lum paidbah ha kano kano ka jaka bad ban sait ia ki kti man ka por.

Ka HYC ka phah ruh iaka khubor sngewlem sha ki bahaing ha sem jong kito ki parashnong parathaw kiba lah khlad noh na kane ka jingpang Covid-19 bad kumjuh ruh ka kitbok kitrwiang ia kito ki parashnong kiba lah ioh ia kane ka jingshitom bad shah sumar ne shah set slung ha ki ing ki sem ki jong ki ba kin ioh noh ia ka met kaba koit ba khiah kham kloi.