T.1 lak yn dain kuna ia kiba pynkhein ia Migrant Workers Act; Rai ka Sorkar ban pyrkhing ia ki nongtrei bylla bar jylla

Syllad | The Rising MeghalayaAugust 3, 2024

Ka sorkar Jylla ha ka 2 tarik Nailar ka la mynjur ban wanrah ka jingpynkylla (amendment) ha ka ain Meghalaya Identification Registration Safety and Security of Migrant Workers Act and Rules, 2020 (MIRSSMW) ka ban tohkit bniah ia ka jinglong jingman jong ki nongtrei bylla bar jylla kiba wan rung sha kane ka jylla bad ban dain kuna haduh T.1 lak ia kiba pynkhein ain.

Haba kren sha ki lad pathai khubor, u nongaiktien ka sorkar MDA uba dei ruh u Myntri Sorkar, u Bah Paul Lyngdoh u la ong, “Ka jingialang jong ka kynhun Myntri ka la mynjur ban pyntreikam ia ka Amendment kaba thymmai ha ka MIRSSMW Act 2020, bad ia kane yn sa rah hapoh ka dorbar   Assembly ka ban wan na ka bynta ban ai ia ka jingmynjur kaba khatduh.

U la ong ruh ba kane ka jingtyrwa kan pynheh ia ka kuna na ka T.5000 sha ka T. 1 lak pyrshah ia kito ki briew kiba pynkhein ia ka Act.

Nalor kata u la ong ruh, “Kawei na ki mat kaba kongsan jong kane ka Amendment bathymmai ka long ba ka sorkar kan pynkhlain ia ka rukom treikam na ka bynta ban pyrkhing  bad wad ia ka jingtip kaba bniah shaphang ka rukom im bad ka jinglong jong ki nongbylla bar jylla khnang ban pynthikna ba tang kito ki bym pat donkti kam bymman kin ioh ban wan trei bylla ha Meghalaya.” U la ong ruh ba ka kynhun Myntri kala rai ba kan pyntreikam ia ka CCTNS.

Lah ban kdew ba kine ki jingpynkylla ia ki kyndon ain ki la wan long ruh hadien ba ki kynhun sengbhalang ki la pynjur ia ki jingkhynra pyrshah ia ki nongtrei bylla bar jylla hapoh ka jylla.

Haba kylli, u Bah Paul u la ong, “Ngin bishar bniah ia ka jinglong bad ia ki jingleh jingkam jong kine ki briew kiba wan trei bylla khnang ban ym shu kyntiew ia ki crime graft hapoh Meghalaya.Lada ki dei kiba la don ia ki dak sniew ia kiba ki la leh ha la ki jong ki jaka shong jaka sah bad ki jylla kiba ki wan, kumta ruh yn shah ba kin ioh jaka hangne.”

Nalor kata haba pynpaw ba ka Meghalaya ka shaniah bha ha ki nongtrei bylla bar jylla kiba wan na bar, u bah Paul u la ong, “Kane ka long namar ka jingduna ki nongtrei bylla kiba dei ki trai shnong, bad kumta ruh ngi khmih lynti ba kin don bun bah ki ban wan rung, bad lada ngim lah ban pynthikna ia ka jinglong ka jong ki, kumta ruh kin buh ka jingma ia ka shongsuk shongshngain hapoh kane ka jylla.”

Nalor kata une u Myntri u la ong ruh ba ki don ar kynhun ki jait briew kiba wan rung shapoh Meghalaya, kata ki nongwan shngai pyrthei lane ki nongtrei bylla.

“Ha kaba iadei bad ki nongwan trei bylla, kin dei kiba pynkhreh ban shong khlam slem, bad dei na kata ka daw ngi la wanrah mynta ia kane ka Amendment ha kane ka ain ka ban teh pyrkhing katkum ki kyndon,” u la bynrap.