T.1000 kawei ka longïing ïarap ka longkmie ha Moodop, Nartiang

Syllad | The Rising MeghalayaJune 4, 2021

Kawei ka longkmie kaba na shnong Moodop Nartiang kala mih shakhmat ban kner jingïarap sha ki longïing kiba kyrduh bad shem jingjynjar ban pyndap pynbiang iaki jingdonkam ha ki ïing ki sem jong ki naka jingkhangdam ban iakhun pyrshah iaka jingpur sted ka khlam COVID-19 bad kala synniang da ka pisa T.1000 shi ïing sha ki 50 tylli ki longïing ha Moodop Nartiang haka sngi Thohdieng.

Kane ka longkmie ka dei kaba trei haka tnad PWD kaba la tip kum ka kong Wanpyntngen Pale.

La aiti ïa kane ka pisa haka jingialang lyngkot kaba pyniaid da u Hamkom Khynriam chairman shnong Moodop, haka jingiadon Lang u ma Dawioo Dkhar waheh shnong, Edressly Pale secretary shnong bad kiwei kiwei.

U waheh shnong Moodop ma Dawioo Dkhar ula pynpaw ka jingsngewnguh ia kane ka longkmie kaba kum ka riew kynthei wat la haka jingtrei kaba rit kala iohi iaka jingeh jingjynar kine ki longïing kiba la shah ktah shisha na ka jingwan lyngshop ka khlam COVID-19.

Kiwei ruh ki dei ban bud iaka nuksa kane ka longkmie kaba don ia kata ka mynsiem ban ai ban iarap iaki para briew ha kum kane ka por ka saw ka sian na ka jingwan lyngshop ka khlam, la ong u waheh shnong.

Ka Moodop ka dei kaba shnong kaba la shah ktah haka khlam bad kila don ruh katto katne ngut kiba la duh iaka jingim na ka jingpang COVID.