T.1,056.82 klur ioh ka Meghalaya na ka MoRD ban pyntrei ia ka skhim PMGSY-III

Syllad | The Rising MeghalayaOctober 24, 2024

Ka Ministry of Rural Development (MoRD) ka la mang ia ka song pisa kaba haduh T.1056.82 klur ia ka Jylla Meghalaya na ka bynta ban pyntrei ia ki 88 tylli ki surok kiba ha ka jingjngai kaba kot 782.155 km bad 55 tylli ki jingkieng iaid kali hapoh jong ka skhim Pradhan Mantri Gram Sadak Yojana-III (PMGSY-III).

Kane ka dei shibynta jong ki sienjam ba la shim da ka Sorkar Pdeng ban kyntiew ia ki lad pyniasoh lyngba ki surok ha ki thain nongkyndong bad ban kyntiew ia ka ioh ka kot bad ka roi ka par ha ka thain Shatei Lammihngi jong ka ri (North East).

Haba bteng ia kane ka sienjam, haduh 55 tylli ki surok kiba ha ka jingjngai kaba 443.26 km la dep ban mang ha ka jinglut kaba kaba kot T.412.34 klur hapoh ka Jylla lyngba ka PMGSY-III.

Kane ka jingpyniasoh lyngba ki surok kan kyntiew ia ki lad jingshakri ba kongsan kum ha ka liang ka koit ka khiah, ka pule puthi bad ki iew ki hat. Kane ka sienjam kan pynthikna ruh ia ki lad pyniasoh hapdeng ki jaka kiba kyndong tam bad ki jaka sor.

Kane ka sienjam ka dei ruh ka jingangnud bad ka thong jong ka Sorkar Pdeng ban iohi ia ka jingkiew ha ki kam khaii pateng bad ki kam pynroi hapoh ka thain Shatei Lammihngi bad ka Ri India hi baroh kawei (Viskit Bharat).

Ki project hapoh jong ka PMGSY-III kin don ka jingktah ka ban pynkylla ia ka thain bad ka ban noh synniang ia ka roi ka par jong ka thain bad ka ban pynskhem ruh ia ka jingangnud jong ka Sorkar halor ka roi ka par jong baroh.