T.3 klur mang u ma Coming One Ymbon ban ai sngewbha 75 snem iaka Govt. Senior Basic School, Mynso

Syllad | The Rising MeghalayaDecember 17, 2024

U Myntri ka tnad Food and Civils Supplies & Consumer Affairs bad kiwei u Ma Coming One Ymbon ula pyntip ba ula buh bhah haduh T.3 klur na ka bynta ban tei iaka iing skul ba thymmai ka Govt. Senior Basic School, Mynso ha shuwa ban kut ka Financial Year 2024-25.

Ia kane ula pynbna haba kren kum u kongsan haka jingpynhap pyrda iaka jingiaid lynti ba 75 snem ka Govt. Senior Basic School, Mynso (1949-2024), haka 17 tarik Nohprah. La iadonlang ka Joint Director of School Education & Literacy bad Incharge DSEO West Jaintia Hills District Kong AP Syiem, ki nonghikai, ki kmie ki kpa, ki khynnah skul, ki nongshah khot sngewbha nalor kiwei kiwei haka jingialang kaba la pyniaid da u Chairman Bah RM Khlem.

Haba kren shuh shuh kum u kongsan U Ma Coming ula ong ba kadei ka kamram ka jong u ban kyntiew iaka skul RMSA sha ka Higher Secondary da kaba pynpaw ruh ka jingsngewdiaw halor ka jingbym ioh jaka ban tei iaka hapoh ka shnong Mynso kaba la dep ban sanction mynta la 3-4 snem mynshuwa bad ula ong ba yn ap hapoh 3-4 bnai bad lada ym ioh jaka yn rah noh shawei.

Ula kyntu ruh iaki trai jaka bad nongshong shnong ka Mynso ban long ki briew kiba riewspah ka mynsiem bad iar ka jingmut jingpyrkhat bad ban don ka jingiatreilang khnang ba ka roi ka par kaba thmu ban wanrah hapoh ka shnong kan long kaba jop bad ba ki khynnah kiba wan na ki longiing ba duna ka ioh ka kot kin lah ban pyndep iaka 10+2 hapoh la ka shnong.

Haba pynpaw ha kaba iadei bad ki skul ha nongkyndong, u Ma Coming ula ong ba bunsien ki nongshong shnong na thain nongkyndong ki ju niewbein iaki skul ba don hapoh ki shong ki thaw, khamtam kiba biang ka ioh ka kot kim ju kham da sngewtynnad ban phah skul iaki khun haki skul shnong bad iabeh ban phah sha sor. Ula kyntu ia baroh ki kmie ki kpa ban phah skul iaki khun haki skul shnong namar kam don kano kano ka jingiapher ruh hapdeng ki skul nongkyndong bad skul sha ki thain sor.

Haba kyntu iaki khynnah bad ki kmie ki kpa, u Bah Coming ula ong ba ka long kaba bakla iaki kmie ki kpa lada ki angnud ban phah skul iaki khun na ka bynta ban ioh iaka kam sorkar kaba tang shitroh, bad kyntu ruh iaki khynnah ban trei shitom khnang ban ioh kheit ia u soh jong ka jingtrei shtom.

Ha kane ka sngi u Myntri ryngkat ka Kong AP.Syiem kila pynkup burom iaki nonghikai barim abd nonghikai ba mynta bad la pyllait ruh iaka kot souvenir kumjuh ka jingplie ia u maw sahnam jong ka jingdap 75 snem,

La pynphuh pynphieng iaka sngi pynkut da ki jingrwai jingshad ba la shim bynta da ki khynnah ka skul kumjuh samla ka shnong.

Khyndiat shaphang ka Govt. Senior Basic School, Mynso la sdang ha u snem 1949 da u (L) H. Hadem da kaba tei halor uwei u lum ba itynnad lum Musiar Shyllong, Mynso. U Humphrey Hadem uba la long MDC bad MLA hadien, u la long uwei na ki nonghikai. Ha ka snem 1971, ki don 8 ngut ki nonghikai. Ka sorkar ka la shimti ia ki skul Basic ha u snem 1974. Ha u snem 1980 la ioh jingiarap na ka sorkar. Ha u snem 1996 la sdang ïa ka Mynso Secondary School. Ha ka por ba la sdang ia ka skhim SSA ha u snem 2004, ka Govt. Senior Basic School la jied kum ka Cluster Resource Centre (C.R.C) hapoh ka Laskein Block.

Haba la sdang ia ka prokram Midday Meal Programme, ka ophis jong ka SSA ka la pynbiang ar tylli ki jaka shet jingshet: kawei na ka bynta ka bynta Upper Primary (U.P.) ha u snem 2010 bad kawei pat na ka bynta ka bynta Lower Primary (LP) ha u snem 2011. Kane ka skul ka la long kaba donbok ban shah jied kum kawei na ki 25 tylli ki skul UPS ban kyntiew sha ka Secondary level hapoh ka RMSA, ryngkat ka jingkyrshan jong u Mr. C. Ymbon, MLA.

Ka skul ka la ioh ia ka jingai jingmut ban sdang ia ka klas IX ha u snem 2013. Hynrei namar ba ym pat seng ia ka klas VIII, kam shym la lah ban ioh ia ka NOC (No Objection Certificate) ban sdang ia ka klas IX ha u snem 2013 bad la sdang iaka klas IX ha u snem 2014. Ha ka snem kaba bud, kata ha u 2015, ka skul kala sdang iaka Class X (Ten) bad phah ban iakhun iaka eksamin SSLC ha u snem 2016.

Ka jingdon jong ki khynnah ha katei ka skul, naduh ka Lower Primary (LP) haduh ka Upper Primary (UP) ka la nang kiew beit na kawei ka snem sha kawei pat. Hynrei kaba sngewsih ka long ba ki nonghikai ki neh kumjuh naduh u snem 1996. Wat la bunsien la kyrpad ïa ka sorkar ban pyndap ïa ki nonghikai hynrei ym shym la leh eiei ban weng ïa kane ka jingduna.

Namar ka jingbun ki samla pule khamtam ha ka bynta jong ka UP, ka la long kaba eh ban pyniaid beit ia ka jingpynrung kyrteng kaba nang kiew. Ka jingduna ki nonghikai ka la khanglad ban pyntreikam ia ki bynta kiba donkam bad ka la wanrah ia ka jingktah kaba khraw ia ka imlang sahlang. Bun ki samla pule na ki longïing kiba duk ha ka liang ka ioh ka kot kim shym la lah ban ïoh rung namar ka jingduna ka jaka bad ki lad jingïarap.

Haduh u snem 2024, ka jingdon ki khynnah skul ka long 311 ngut, ki nonghikai (kynthup ïa u nongpeit kkul): 9 ngut, non-teaching staff 3 ngut bad nongshet 8 ngut.