T.30 klur tyrwa ka sorkar ban tei ia ka veterinary hospital ha Upper Shillong

Syllad | The Rising MeghalayaFebruary 21, 2024

U Myntri Rangbah ka Jylla, u Conrad K Sangma haka 20 tarik Rymphang, u la ong ba ka sorkar ka la tyrwa ia ka mang tyngka kaba T.30 klur na ka bynta ban tei ia ka veterinary hospital hapoh Upper Shillong.

“Ngi la dep ban phah ia ka jingtywa na ka bynta ka mang tyngka kaba T.30 klur lyngba ka Prime Minister’s Development Initiative for North East Region (PM-DeVINE) ha kaba iadei bad kane ka bynta,” ong u CM haba jubab ia ka jingkylli hapoh ka iingdorbar thaw ain.

Kham hashwa u nongialam liang pyrshah u Bah Ronnie V Lyngdoh u la kyrpad ia u Myntri ba dei khmih ia ka Tnat Animal Husbandry & Veterinary u Bah AL Hek na ka bynta ban iakren bad u Myntri Rangbahduh ka ri u Narendra Modi na ka bynta ban wanrah ia ka veterinary hospital hapoh ka jylla namar u dei ruh u nongialam ba la rim jong ka BJP na Meghalaya.

Ha ka jingsngew ka jong u, u Bah Ronnie u la ong ba ka jingthmu jong ka sorkar ban iarap ia ki nongri jingri da kaba sam ia ki khun sniang kan ym long kaba seisoh lada ym lah ban shim ia ki sienjam ban iada na ka jingiap jong ki sniang hapoh ka jylla.

Katba u nongmihkhmat ka Congress na Mawhati, u Bah Charles Marngar u la buh ka jingkyrpad ia ka sorkar jylla ba kan khmih bniah biang na ka bynta ban siew ia ka bai lutskan sha ki nongri jingri namar ka jingkynrei ka jingiap sniang ha ka jylla.

Halor kane u Bah Hek u la ong ba kam shym la don kano kano ka jingsiew bai lutksan sha ki nongri jingri namar ki lah ban kam ia ka insurance kaba T.4,000 uwei u sniang.