Tah poster ka KSU ha kylleng ka Rilum Jaiñtia ban pyrshah CAA, dawa pyntreikam ïaka ILP MRSSA

Syllad | The Rising MeghalayaJanuary 21, 2020

JOWAI: Ka Khasi Students’ Union (KSU) Jaiñtia Hills District Unit haka sngi ba ka jylla kala rakhe ïaka jingioh jylla ba 48 snem kala pynlong iaka jingtah poster ban pyrshah ïaka jingpylong aiñ Citizenship Amendment Act (CAA) bad dawa mardor ban pyntreikam ïaka Inner Line Permit (ILP) bad ka Meghalaya Residents Safety and Security Act (MRSSA) haka Jylla.

Ki nongialam bad ki dkhot ka KSU hapoh ka jingialam S Stremlet Niangti finance secretary, Cherity Suja general secretary Jaintia, Morning Pasi president Jowai circle bad ki dkhot ka KSu na kylleng ka rilum Jaiñtia kila tah poster ban pyrshah ïaka CAA bad ban dawa pyntreikam mardor ïaka ILP haka sngi ba Ar.

La tah ïa kine ki poster haki kynroh, ki biar, ki kali ha kylleng ka Jowai bad Khliehriat.

“Ka KSU kala pynlong ïa kane ka jingtah poster ban pyrshah ïaka CAA bad ngi sngew ba donkam ban pyntreikam kyrkieh ïaka ILP bad MRSSA ban ïada ïaka jylla naka jingwan buhai shnong ki bar ri ki mynder ri,” la ong u Streamlet Niangti.

“Kane ka jingtah poster kalong ban phah ïaka khubor sha u Myntri Rangbah Duh ka Ri bad bad u Myntri kam pohïing ka Sorkar Pdeng. Ngi dawa ban pyntreikam mardor ia ka ILP hapoh ka Jylla Meghalaya bad ban pyllait naka jingtreikam ka CAA ha baroh ka thaiñ Northeast,” ong shuh shuh une u nongïalam bad ula bynrap ba ka sorkar jylla kadei ruh ban shimkhia ban pynbor ïaka sorkar pdeng ban pynrulong ïa kane ka jingdawa u nongshong shnong ka jylla.

Ka KSU kala ong ban im ka ri kin nym shongthait bad iakhih pyrshah lada ym weng iaka CAA bad pyntreikam iaka ILP bad MRSSA ha jylla.