Tang 1264 ki dukan bar jylla ba don Trading license, byrthen ujor PIL ka AJYWO lada ym khynra ka JHADC

Syllad | The Rising MeghalayaJune 16, 2019

JOWAI: Ka AJYWO Central Body, katkum ka jubab RTI, ka la lap ba don tang 1264 tylli ki Trading Licence jong ki bar jylla kiba la wan pynthymmai ia ki Trading License jong ki ha Rilum Jaiñtia bad ka JHADC ka la ioh lum khajna T. 1,21,13,652/- tyngka na kine dukan bar jylla.

Kine ki Non-Tribal kiba la ioh Trading Licences ki don ia ki jaka khaii haka shnong Byndihati-1, Chiehruphi-7, Caroline Colony-1, Dawki- 3, Dkhiah East-32, Dkhiah West-6, Ialong-2, Iawmusiang- 59, Khliehriat-17, Khliehriat East-78, Khliehriat West-116, Ladrymbai-11, Ladrymbai B-158, Ladrymbai Datsimpein-102, Ladrymbai Dongwah-85, Ladrymbai Khliehdupon-128, Ladthadlaboh-16, Lumshnong-41, Mihmyntdu-3, Mihmyntdu B-1,Mission Compound Jowai-1, Mookhep-1, Mookyrdup-1, Moolamylliang-6, Moopala-5, Muktapur-1, Musiang Lamare-7, Mynkre-25, Nartiang-2, New Hill– 32, Nongsning-10, Ratacherra-1, S.J. Road Jowai-1, Sookilo-21, Sunapur-1, Sutnga-1, Thadlaskein-1, Thangskai-45, Tongseng-9, Tympang Club-7, Umkiang-33, Umlaper-4, Ummulong-2, Wahiajer-1, Wapungskur-1, 7mer (Pasyih)-17, 8mer (Phramer)-43 bad 118 tylli ki Trading Licences kiba ioh ban khaii ha bun tylli ki shnong na kawei ka Licence.

Ka AJYWO kam pdiang satia ba don tang 1264 ki bar jylla kiba khaii haduh mynta ha baroh kawei ka Rilum Jaiñtia bad kala buh jingkylli ïaka JHADC shaei jah ki Trading License jong ki hajar tylli ki dukan bar jylla ha RilumJaiñtia.

Ka AJYWO kala pynpaw ka jingbyññiaw halor kane ka jingduna ki bar jylla kiba ioh license bad kala kynthoh ba ka JHADC kam shym la lah satia ban pyntreikam ia ka aiñ ‘The Jaintia Hills Autonomous District (Trading by Non-Tribal) Regulation (Act), 2011 bad buh jingkylli hato ka JHADC kam tip ba jyllei ki dukan bar jylla khlem Trading Licence ha Ladrymbai, Sookilo, Phramer, Khliehriat, thain War, Umkiang, Ratacherra bad kiwei kiwei ki shnong.

U Reachingson Siangshai, Vice President jong ka AJYWO ula ong ruh ba ki bar jylla kiba don ia ka Trading Licence ki khlem bud ia ka kyndon (Rule) 9 jong ka ‘The Jaintia Hills Autonomous District (Trading by Non-Tribal) Rules, 2015’, kaba kdew shai ba kiba don ia ka licence ki dei ban teh ha ki dukan jong ki iaka license, khnang ban tip ia ka jongdon Trading Licence jong ki.

“Ka AJYWO ka dawa jur na ka JHADC ban khynra bad khang lut ia baroh ki dukan jong ki bar jylla ki bym don Trading Licence bad lada ka JHADC kam shimkhia ban khynra ïaki dukan bar jylla, kala byrthen ban ujor da ka mukotduma PIL pyrshah ïaka JHADC.